1.3 milionë familje greke, kompensim për ngrohjen – Shuma totale e parashikuar në ndihmë të tyre është 500 milionë euro

Janë 1.3 milion familje greke, që do të kompensohen për ngrohjen këtë dimër. Vendimi i përbashkët ministror që do të specifikojë kërkesat për kompensimin e ngrohjes, disbursimi i të cilit do të fillojë pak para Krishtlindjeve dhe do të përfundojë në fund të prillit 2023, do të dalë këtë javë.

Shuma totale që do të ndahet është 500 milionë euro, së bashku me subvencionimin 25 cent për litër në pompë, masë që në fazën e parë do të zbatohet deri në fund të vitit 2022, pa përjashtuar mundësinë e zgjatjes së saj në rast se kërkojnë kushtet.

Familjet që përfitojnë këtë të drejtë janë rreth 1.3 milionë këtë vit, ndërsa në vitin 2021 kjo shifër ishte nën 900 mijë; kjo për shkak se baza e kriterit të pasurisë është rritur për shkak të rritjes së vlerave objektive të pasurisë.

Shuma më e lartë që do të marrë një familje do të jetë 800 euro, nga 750 euro vitin e kaluar, dhe më e ulëta 100 euro, e njëjtë si në vitin 2021.

Këtë vit, familjet që do t’i rikthehen naftës për ngrohje në vend të çdo karburanti tjetër për ngrohje, gaz natyror ose energji elektrike, do të marrin dyfishin e kompensimit për ngrohje.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.