400 vende vakante në burgjet shqiptare – Relacioni: Ska interes konkurrimi për Policinë e Burgjeve. Në rrezik serioz siguria

Policia e Burgjeve po përballet me mungesë personeli. Kjo evidentohet në projektligjin e ri që ësht depozituar për konsultim publik. Në total, në strukturën e Policisë së Burgjeve janë rreth 400 vende vakante. Ligji i vitit 2020 reformoi në tërësi Policinë e Burgjeve duke përcaktuar rregulla të qarta mbi organizimin dhe funksionimin e saj  por pavarësisht se kanë kaluar më pak se dy vite nga hyrja në fuqi e tij, në praktikë janë shfaqur disa problematika, kryesisht sa i takon rekrutimit të punonjësve.

“Drejtoria e Policisë së Burgjeve e ushtron veprimtarinë në nivel qendror dhe në 22 institucione të ekzekutimeve të vendimeve penale (IEVP). Për shkak të shumë problematikave të parashtruara rezulton se në 3 proceset e fundit të rekrutimit të punonjësit të rolit bazë në Policinë e Burgjeve numri i pjesëmarrësve ka qenë disa herë më i ulët se numri i vendeve të lira që kishte shpallur Drejtoria e Përgjithshme e Burgjeve, duke sjellë si pasojë zhvlerësimin e procesit të konkurrimit. Gjithashtu, është konstatuar se shumë konkurrentë janë skualifikuar nga e drejta për konkurrim për shkak të kriterit të moshës nën 35 vjeç” shkruhet në relacionin e ligjit.

Në këto kushte, një pjesë e burgjeve po i kryejnë detyrat në fushën e sigurisë me 25 – 30 % mungesa në staf duke hasur në vështirësi serioze në ruajtjen e rendit dhe sigurisë, ulje të cilësisë së shërbimit, rënie të vigjilencës etj.

Ndryshimet e reja ligjore parashikojnë opsionin e rikthimit në punë të atyre që janë larguar nga Policia e Burgjeve. Po ashtu, parashikohet që punonjësit e rolit bazë dhe të mesëm të emërohen nga drejtori i Përgjithshëm i Burgjeve mbi bazën e propozimit të drejtorit të Policisë së Burgjeve dhe punonjësit e rolit të lartë drejtues emërohen nga ministri i Drejtësisë, bazuar në propozimin e drejtorit të Përgjithshëm të Burgjeve.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.