50% e italianëve, jo blerje për fundvit – Çmimet e shtrenjta, gjithnjë e më shumë njerëz reduktojnë shpenzimet

Çmimet e shtrenjta dhe inflacioni prej 12%, ‘errëson’ konsumin e familjeve italiane: sinjalet e para e frenimit kërcënojnë muajt e fundit të vitit, përfshirë këtu dhe blerjet për vit të ri. Shqetësimi tek qytetarët është në rritje, aq sa shkakton reduktim të shpenzimeve, të konfirmuar nga analiza e rezultateve të shoqërisë lider në tregun dixhital, Toluna.

Në një kampion përfaqësues prej 1.044 personash, pjesa më e madhe e të intervistuarve, 94%, mendon se inflacioni do të zgjasë në kohë, me rritje të vazhdueshme çmimesh; 87% mendon se rritja e përgjithshme e çmimeve do të ndikojë – mjaftueshëm ose shumë – në zgjedhjet e konsumit të familjeve. Nga analiza del në pah se nuk ka ndryshime të rëndësishme gjeografike apo moshe në sjellje, për sa i përket shpenzimeve. Në 9 raste nga 10 shtrenjtimi i çmimeve ka shkaktuar pesimizëm dhe shqetësim, duke ndikuar në zgjedhjet e konsumit për familjet.

Nga një e treta deri tek gjysma e të intervistuarve – në varësi të llojit të produkteve – vendosën që të shtyjnë apo anulojnë shpenzimet që kishin në program për të bërë brenda fundit të 2022-shit për shkak të çmimeve të larta.

Shqetësues në mënyrë të veçantë është fakti se 30% e të intervistuarve, pohojnë se kanë shtyrë për në vitin 2023, apo dhe kanë anuluar, shpenzime për sa i përket shëndetit, si dentisti, ndërhyrje private apo vizita kontrolli. Raporti thekson se reduktimi i shpenzimeve përqendrohet tek argëtimi apo tek aktivitetet jashtë shtëpisë.

Më shumë se katër persona në 10 pranojnë se kanë anuluar apo shtyrë në kohë blerjen e pajisjeve elektronike, udhëtimet apo pushimet. Pothuajse pesë në 10, kanë hequr dorë nga blerja e pajisjeve elektroshtëpiake apo arredimit të shtëpisë. E njëjta shifër është dhe për ata që heqin dorë nga shpenzimet për veshjet, ndërsa mes atyre që kishin në program të blinin bizhuteri apo automjete, vetëm 9% deklarojnë se duan t’i realizojnë blerjet.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.