87 % e qytetarëve mendojnë se bashkitë po u shpërdorojnë paratë – Sondazhi/ “Shërbimet publike janë përkeqësuar”

Afro 87 për qind e qytetarëve shqiptarë mendojnë së taksat që ata paguajnë për bashkitë ku jetojnë, shpërdorohen.  Të dhënat janë bërë publike nga anketa e CoPlan, “Perceptimi qytetar mbi taksimin vendor dhe shërbimet publik”,   ku theksohet se pavarësisht këtij perceptimi mbi njësitë e qeverisjes vendore, 94% e të intervistuarve nuk ka raportuar ndonjëherë për shpërdorimin e parasë publike , kjo pasi mbizotëron ndjenja e frikës që raportimi të kthehet në problem për raportuesin dhe mungesa e besimit që raportimi të jetë efektiv.

Ndërkohë, taksapaguesit mendojnë gjithashtu se gjatë vitit 2022, disa nga shërbimet publike të bashkive janë përkeqesuar, ku përfshijnë këtu strehimin social, shërbimet sociale, sigurinë publike, shëndetësinë, transportin publik, hapësirat publike artin, kulturën dhe sportin, ndërsa dy treguesit më problematikë renditen menxhimi i mbetjeve dhe zhvillimi ekonmoik vendor.

Në përgjithësi, të intervistuarit shprehen të pakënaqur me shërbimet publike vendore përkundrejt rëndësisë që vlerësohet të jetë e lartë. Referuar raportit,  oferta aktuale e shërbimeve publike vendore qëndron ndjeshëm nën pritshmëritë e të intervistuarve.

Në dokument theksohet se në prani të burimeve financiare të kufizuara, është me rëndësi që ato të përdoren me efiçiencë dhe efektivitet, duke prioritarizuar ato kategori shërbimesh që kanë përparësi për qytetarët. Në këtë drejtim, tre shërbimet e prioritarizuar nga të intervistuarit për t’u përmirësuar janë: shërbimet shëndetësore parësore; shërbimet në fushën e zhvillimit ekonomik vendor; dhe menaxhimi i mbetjeve.

Elisabeta Dosku/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.