9 bashki, “të mbytura” në borxhe – Vështirësi financiare, pr.ligji në Kuvend: T’i paguajnë nga fondet e trashëguara të 1 viti më parë 

Bashkitë do të mund të përdorin fondet e trashëguara nga një vit më parë për shlyerjen e borxheve apo pagimin e nënhuave të papaguara në kohë”. Gjithçka parashikohet në disa ndryshime në ligjin “Për financat e vetëqeverisjes vendore”, që ka mbërritur në Kuvend për diskutim e që specifikon se niveli i fondeve që mund të përdoret për këtë qëllim është jo më pak se 30% e fondeve të trashëguara e të paangazhuara.

Sipas relacionit që shoqëron projektligjin, ky ndryshim ka për qëllim uljen e masës së detyrimeve të prapambetura që mund të krijojnë njësisë së vetëqeverisjes vendore, duke e klasifikuar si një masë që do të parandalonte apo zgjidhte vështirësitë financiare të bashkive. Sipas të dhënave të fundit të disponueshme, në fund të tremujorit të tretë të vitit 2022, stoku i detyrimeve të prapambetura nga bashkitë arriti në rreth 6.6 miliardë lekë, në rritje me 70 milionë lekë, krahasuar me fundin e vitit 2021, teksa 60% e shumës disponohet nga vetëm 9 bashki.

Niveli më i lartë i stokut të detyrimeve të prapambetura u regjistrua në Bashkinë Tiranë me rreth 1.5 miliardë lekë, ose 23% ndaj stokut total. Të dhënat tregojnë se borxhet e Bashkisë Tiranë janë rritur ndjeshëm, duke qenë se në fund të vitit 2021 rezultonin në rreth 653 milionë lekë. Rreth 50% e detyrimeve të palikujduara nga ky dikaster janë për investime dhe rreth 39% për shpenzime të tjera.

Ndërkaq, Bashkia Kavajë renditet e dyta për nga niveli i detyrimeve të prapambetura, me rreth 741 milionë lekë, ose rreth 11% ndaj totalit, ndërsa e treta për peshën ndaj stokut të detyrimeve të prapambetura rezulton bashkia Vorë me rreth 412 milionë lekë apo rreth 6% e stokut total. Ndërkaq, stoku i detyrimeve të prapambetura është i papërfillshëm në bashkitë si Dropulli, Këlcyra, Patosi, Shkodra, Kolonja, Korça, Fushë Arrëz, etj.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.