950 milionë dollarë humbje – Inflacioni në rritje i Turqisë po ndez sinjale paralajmëruese për bankat e Gjirit!

Bankat me ekspozim ndaj Turqisë janë përballur me humbje që kur monedha e vendit filloi të zhvlerësohej ndjeshëm në vitin 2018; tani, huadhënësit në disa shtete të Gjirit të pasura me naftë në veçanti do të goditen vitin e ardhshëm për shkak të lidhjeve të tyre me vendin, sipas një raporti të fundit nga agjencia e vlerësimit Fitch.

Bankat në Këshillin e Bashkëpunimit të Gjirit – që janë Bahrejni, Kuvajti, Omani, Katari, Arabia Saudite dhe Emiratet e Bashkuara Arabe – me filialet turke duhej të miratonin “raportimin e hiperinflacionit” në gjysmën e parë të vitit 2022, shkroi Fitch këtë javë, ndërsa inflacioni kumulativ në Turqi gjatë tre viteve të fundit ka tejkaluar 100%.

Fitch llogarit se bankat GCC me filialet turke kanë shënuar humbje neto prej rreth 950 milionë dollarë në gjysmën e parë të këtij viti. Ndër më të goditurat ishin Emirates NBD – banka kryesore e Dubait – dhe Kuwait Finance House, banka e dytë më e madhe në Kuvajt. Ekspozimi turk për Kuwait Finance House dhe Emirates NBD është përkatësisht 28% dhe 16% e aseteve të tyre. Banka Kombëtare e Katarit ishte gjithashtu në mesin e të prekurve.

“Fitch i ka parë gjithmonë ekspozimet turke të bankave GCC si negative për kredinë”, shkroi firma e vlerësimit. “Ekspozimet turke janë një rrezik për pozicionet e kapitalit të bankave GCC për shkak të humbjeve të përkthimit të monedhës nga zhvlerësimi i lirës.”

Lira ka humbur 26% të vlerës së saj kundrejt dollarit nga vjet, duke i bërë importet dhe blerjen e mallrave bazë shumë më sfiduese për 84 milionë banorët e Turqisë.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.