Tren i ri me shpejtësi të lartë Paris-Berlin – Shërbimi nis në dhjetor dhe udhëtimi zgjat rreth tetë orë

Kristi Ceta/SCAN

 

Një tren i ri me shpejtësi të lartë që lidh Parisin dhe Berlinin do të nisë operimin në dhjetor. Shërbimi i ditës do të plotësojë një linjë të njohur treni të natës midis dy kryeqyteteve, e cila u rinis vitin e kaluar me shumë bujë, por që atëherë ka pasur probleme teknike.

Shërbimi i trenit gjatë ditës, i cili është vonuar për shkak të çështjeve logjistike dhe do të zgjasë një orë më shumë se sa ishte paralajmëruar fillimisht, do të qarkullojë midis Berlin Hauptbahnhof dhe Paris Gare de L’Est, duke ndaluar në Strasburg, Karlsruhe e Frankfurt Süd dhe do të zgjasë rreth tetë orë.

Udhëtimi më i shpejtë me tren që kalon tani midis kryeqyteteve franceze dhe gjermane zgjat pak më pak se nëntë orë, por kërkon dy ose tre ndryshime treni, duke krijuar një përvojë të ngadaltë e të lodhshme.

Fillimisht do të ketë vetëm një shërbim të trenit të ri çdo ditë, duke u nisur nga Parisi në 9:55 të mëngjesit dhe duke mbërritur në Berlin vetëm pas orës 18:00. Udhëtimi i kthimit do të niset në orën 11:54, duke mbërritur në kryeqytetin francez pak para orës 20:00.

Operatorët SNCF dhe Deutsche Bahn shpresojnë që pasagjerët ta shohin rrugëtimin si një alternativë relaksuese ndaj fluturimit dhe një përmirësim të konsiderueshëm nga itinerari aktual. Tarifat do të fillojnë nga 59 € për një biletë të klasit të dytë me një drejtim dhe nga 69 € për një vend të klasit të parë. Çmimet do të ndryshojnë sipas kërkesës.

DB dhe SNCF filluan të bashkëpunojnë në vitin 2007, dhe që atëherë trenat me shpejtësi të lartë kanë lëvizur midis Parisit dhe Frankfurtit apo Shtutgartit. Shtesa Berlin-Paris është pritur prej shumë vitesh, si një zgjedhje politike për të bindur njerëzit të largohen nga avionët dhe makinat, por edhe si një tendencë e kohëve të fundit për udhëtime më të ngadalta.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.