A po funksionon eksperimenti “Java e shkurtër e punës” në Britani? – Punonjësit janë më të lumtur dhe pronarët më të pasur

Punonjësit janë më të lumtur dhe të ardhurat më të larta. Java e shkurtër e punës i kënaq të gjithë: të punësuar e punëdhënës. Kështu rezulton në Britaninë e Madhe. Në pritje të studimeve zyrtare nga universitetet e Cambridge dhe Oxford së bashku me Boston College, që do të jenë gati në shkurt të vitit të ardhshëm, një raport ka publikuar rezultatet e katër ditë pune në javë në 70 kompani britanike.

Eksperimenti i javës së shkurtër të punës, pa ndryshim page, ka zgjatur disa muaj. Dhe rezultatet për prodhimin dhe mirëqënien fizike dhe mendore janë pozitive sipas këtij raporti.

Mungesat në punë janë reduktuar ndjeshëm, por dhe dorëheqjet, gjithashtu në raportin e publikuar në Financial Times, të gjithë janë shumë të kënaqur për ekuilibrin mes jetës private dhe asaj profesionale. Ndërsa të ardhurat e kompanive janë rritur meësatarisht me 8%. Nga ana tjetër prodhimi është rritur me 25% në katër ditët e punës në javë.

Projekti pilot irlandez është kryer në 33 sipërmarrje duke përfshirë 903 të punësuar. Në këtë rast 27 kompani në fund të eksperimentit vendosën të vazhdojnë me javën e shkurtër të punës me të njëjtën pagë pasi dolën të kënaqur nga rezultatet dhe niveli i prodhimit e të ardhurat. Këto të fundit janë rritur me 38% në krahasim me një vit më parë.

97% e 495 punonjësve u shprehën se janë më pak të stresuar dhe të lodhur me përmirësime konkrete në shëndetin fizik dhe mendor. Nga vit 2019, në Japoni Microsoft i ka dhënë një ditë më shumë pushim nënpunësve dhe prodhimi është rritur me 40%.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.