A po shkojnë vendet e Ballkanit Perëndimor drejt anëtarësimit në BE?!

Procesi i Berlinit, i ngritur në vitin 2013, synonte të afronte Ballkanin Perëndimor me BE-në. Deri më tani, formati ka qenë kryesisht një mundësi fotografike për politikanët. Kjo është gati të ndryshojë në një takim në Berlin të enjten.

“Po flasim për hapa historikë” kështu njoftoi Ministrja e Jashtme gjermane Annalena Baerbock nënshkrimin e planifikuar të tre marrëveshjeve në Konferencën e Ballkanit Perëndimor, një samit në Berlin ku përfshihen politikanë kryesorë nga Shqipëria, Bosnja dhe Hercegovina, Kosova, Mali i Zi, Maqedonia e Veriut, Serbia dhe Bashkimi Europian në kuadër të Procesit të Berlinit.

Procesi i Berlinit filloi në vitin 2014 nën drejtimin e kancelares Angela Merkel për të afruar gjashtë shtetet e Ballkanit Perëndimor me BE-në. Takimet deri më sot kanë qenë kryesisht mundësi fotosh të përbashkëta për politikanët. Megjithatë, këtë herë fokusi do të jetë në çështje konkrete, duke përfshirë njohjen reciproke të kartave të identitetit, diplomave universitare dhe diplomave profesionale.

Ajo që tingëllon si një formalitet do të ishte një hap përpara për njerëzit e Ballkanit Perëndimor, duke pasur parasysh se nënshkruesit përfshijnë vende si Serbia dhe Kosova, të cilat u përballën në luftën e Kosovës në vitin 1999 dhe ende nuk e kanë njohur zyrtarisht pavarësinë e njëri-tjetrit.

Në një konferencë përgatitore më 21 tetor në Ministrinë e Jashtme të Berlinit, Baerbock e bëri të qartë se i konsideron nënshkrimet e ardhshme si një meritë për diplomacinë gjermane. Kancelari Olaf Scholz foli me të gjithë krerët e qeverive dhe shteteve të Ballkanit Perëndimor në muajt e parë të mandatit të tij në detyrë dhe ai gjithashtu vizitoi rajonin.

Interesi për Ballkanin Perëndimor është rritur ndjeshëm në BE që nga sulmi rus ndaj Ukrainës më 24 shkurt 2022. Serbia, si dhe Republika Srpska pjesa e mbizotëruar nga serbët e Bosnjës nuk e mbështesin ose vetëm me gjysmë zemre politikën e BE-së kundër regjimit të Putin. Moska po përpiqet të fitojë ose të rrisë ndikimin e saj edhe në vendet e tjera të Ballkanit Perëndimor.

Krijimi i një tregu të përbashkët rajonal për gjashtë shtetet e Ballkanit Perëndimor është në qendër të konferencës së Berlinit. Marrëveshjet ndërqeveritare të planifikuara synojnë të ndihmojnë në lidhjen e Ballkanit Perëndimor me tregun e BE-së.

“Marrëveshjet mund t’i japin një dinamikë të re lëvizshmërisë në rajon dhe bashkëpunimit ekonomik, duke e bërë atë një kontribut të rëndësishëm në krijimin e një tregu të përbashkët,” tha Anja Quiring nga Komiteti Gjerman për Marrëdhëniet Ekonomike të Europës Lindore. Është e vështirë të thuhet se si do të reflektohen marrëveshjet në terma konkretë, tha Quiring, duke shtuar rëndësinë e harmonizimit të mëtejshëm në nivelet ligjore dhe rregullatore në rajon.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.