Agjencia e Trajtimit të Pronave mbetet ‘dyerve’ të gjykatave – ‘Valë’ ankesash gjatë 2022. Për rreth 2 mijë dosje ka ankime
Ndërsa gjatë vitit të shkuar Agjencisë së Trajtimit të Pronave ju desh të përballej me më shumë se 2 mijë padi të ngritura nga pronarët kundër saj, flukset e ankimeve të reja në gjykatë kanë qenë shumë të larta për 2022. Nga të dhënat zyrtare të vetë Agjencisë, rezulton se deri në fund të nëntorit të vitit që sapo lamë janë depozituar në total 429 padi të reja.
Shkurti dhe tetori kanë qenë muajt kur janë depozituar më shumë padi, përkatësisht 51 dhe 54, ndërkohë që ato kanë vijuar në mënyrë të pandërprerë përgjatë gjithë vitit. është vetë agjencia që gjithashtu pranon se për vitin e shkuar i është dashur të përballet me mbi 2 mijë padi, nga të cilat në gjysmën e parë të vitit kishte arritur të ankimonte vetëm 348, nga 1936 të planifikuara.
Në raportin për tetë muajt e parë të vitit 2022 Agjencia justifikohej për mosankimimin e vendimeve me vështirësitë e sistemit gjyqësor për shkak të shkakrimit të gjyqtarëve. Por në raportin e një viti më parë, sektori juridik i Agjencisë nënvizonte se e kishte të pamundur ta ndiqte fizikisht në gjykata fluksin e padive.
Me hyrjen në fuqi të ndryshimeve në Ligjin e Pronave këtë vit, Qeveria i ka ftuar pronarët të tërheqin dosjet e shumta gjyqësore dhe t’i drejtohen ATP-së për të përfituar kompensim sipas formulës së re, e cila garanton jo më pak se 10% të vlerës reale të pronës. Por sipas shoqatave të pronarëve zor që kjo të ndodhë, pasi, ligji i ri nuk ka respektuar kushtin e vendosur nga Gjykata e Strasburgut për kompensim minimal prej 10% të vlerës.
Sipas tyre, ndryshimet ligjore jo vetëm lënë pronarët fare pa kompensim, por nuk mungojnë as rastet kur ata i dtyrohen shtetit. Vetë shoqatat e pronarëve kanë thënë se do ta dërgojnë përsëri ligjin në Kushtetuese, ndërkohë që presin edhe vijim të padive të reja ndaj Agjencisë së Trajtimit të Pronave.
Lorenc Rabeta / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.