Akumulatorët elektrikë, pa akcizë – Propozimi i qeverisë për kursimin e energjisë, 50 milionë lekë më pak në buxhet
Akumulatorët elektrikë do të përjashtohen nga taksa e akcizës”. Gjithcka përcaktohet në ndryshimet ligjore, që janë nxjerrë për konsultim publik, si pjesë e paketës fiskale për vitin 2023.
Relacioni, që shoqëron projektligjin, shpjegon se Ministria e Financave dhe Ekonomisë në kuadër të zbatimit të strategjisë për kursimin e energjisë si dhe subvencionimit të çmimit të paneleve diellore, ka propozuar heqjen e akcizës për akumulatorët për panelet diellore dhe makinave elektrike.
“Me hyrjen në përdorim të makinave elektrike, që burimin e tyre të energjisë kanë akumulatoret, është e nevojshme të rishikohet akciza për këtë produkt ndërkohë që e gjithë makina elektrike jo vetëm që nuk ka akcizë, por ka edhe 0% TVSH në momentin e importit”, – thuhet ndër të tjera në relacion, duke shtuar se një masë stimulimi të përdorimit të makinave me akumulatorë është marrë tashmë në të gjithë Evropën, si pjesë e politikave të mbrojtjes së mjedisit. Ndërkaq, të ardhurat nga akciza, si pasojë e këtij përjashtimi parashikohet të reduktohen me 50 mln lekë.
Përveç ndryshimit të kësaj takse, paketa fiskale e vitit që vjen do të ketë disa ndryshme të tjerë, që sipas qeverisë bëhen në kuadër të politikave për kursimin e eenergjisë. Nje prej tyre është përjashtimi i druve të zjarrit nga TVSH, me qëllim mbrojtjen dhe mbështetjen e individëve në kushtet e krizës energjitike.
Po ashtu, propozohet që energjia e importuar që do të tregtohet përmes Bursës Shqiptare të Energjisë Elektrike do të përjashtohet nga Tatimi mbi Vlerën e Shtuar”. Sipas relacionit, që shoqëron projektligjin, qëllimi i kësaj mase është garantimi i tregtimin të energjisë elektrike në një treg të organizuar.
Ola Mitre / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.