Anije kargo me vela dhe tragete elektrike – Transporti detar zgjedh emetimet zero
Anijet mbeten ndër ndotësit kryesorë të ambientit në botë. Për këtë arsye në Francë po rikthehet në modë një metodë e pastër për t’i vënë në punë dhe shumë antike njëkohësisht: anijet kargo me vela. Këto të fundit në fakt janë rezultat i viteve të tëra kërkimesh dhe zhvillimi. Shoqëria franceze “Grain de Sail” shprehet se ka ndërtuar anijen e parë moderne me vela që plotëson kërkesat e një flote tregtare.
Shoqëria e cila prodhon cokollatë dhe kafe, ka ndërtuar varkat e saj duke u nisur nga zero dhe duke menduar për mbrojtjen e ambientit. Anija orej 50 ton është e pajisur me kontrollues klimatik që furnizohet nga energjia diellore dhe ajo eolike. Ndërtuesit e saj theksojnë se është dhe shumë ekonomike, dhe objektivi mbetet ndërtimi i një flote shumë të madhe me anije të tilla.
Përdorimi i erës për të reduktuar emetimet është një tendencë në rritje në këtë industri. Ndërkohë një prodhues tjetër, Airseas, propozon një sistem të automatizuar balonash që synon reduktimin e karburantit dhe emetimeve të anijes nga 10% në 40%. Anijet e pasagjerëve duhet të lundrojnë shpejt dhe nuk mund të mbështeten vetëm tek era.
Në Stavanger, që njihet dhe si kryeqyteti i naftës në Norvegji është në shërbim Medstraum, një traget totalisht elektrik i prodhuar në kuadër të një projekti kërkimi të financuar nga Bashkimi Europian. I shpallur si anija e vitit, nga revista norvegjeze e lundrimit, Medstraum është trageti i parë në botë që është i shpejtë dhe totalisht elektrike. Bateritë e vendosura sipër urës, ushqejnë të paktën dy motorë elektrikë. Trageti nuk përdor lëndë djegëse as dhe si rezervë, dhe motori elektrik është shumë më i vogël se ai me djegie. Konsumi është deri në 1500 kilovatorë, rreth 15 herë më shumë se ai i një automjeti të zakonshëm elektrik.
Mund të lundrojë më shumë se një orë pa ndërprerje dhe të transportojë 150 pasagjerë në mënyrë të rehatshme dhe pa zhurmë. Duke qenë pjesë e sistemit të transportit publik oraret janë të njëjta me tragetet tradicionale. Ndërsa ekuipazhi shprehet se drejtimi i tij është njësoj me atë me lëndë djegëse.
Dorina Kurtaj / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.