Aplikohet për 3 centrale diellorë – Investitorët, interes për energjinë fotovoltaike. Nuk përfitojnë nga masat mbështesëse

3 aplikime të reja kanë mbërritur pranë Ministrisë së Infrastrukturës dhe Energjisë për ndërtimin e centraleve të mëdhenj fotovoltaikë, duke treguar interesin që investitorët kanë për energjinë diellore. Referuar aplikimeve, fuqia e instaluar për njërin prej projekteve është 25 MW, ndërsa parashikohet të ndërtohet në fshatin Povelçë të Fierit.

Aplikimi i dytë përfshin një central me kapacitet të instaluar 38.9 MW, në fshatin Bashkim të Lushnjes, ndëra tjetri parashikon ndërtimin e një centrali 10 MW, në fshatin Mirakë të Librazhdit. Paralelisht me këto kërkesa, edhe një aplikimi i katërt parahsikon ndërtimin e një centrali 2 MW, në Himarë.

Në rast të finalizimit të procedurave, ky do të jetë projekti i vetëm që mund të përfitojë nga masat mbështetëse të qeverisë, ndërsa 3 projektet e tjerë për ndërtimin e parqeve të medhenj fotovolatikë nuk do të përfitojnë. Së fundmi, investitorët kanë rritur interesin për ndërtimin e centraleve të mëdhenj fotovoltaikë, pasi janë një sërë kërkesash të bëra pranë MIE.

Pak muaj më parë, pranë këtij dikasteri u dorëzuan edhe 2 aplikime të tjerë, për centrale me fuqi të instaluar prej 100 MW dhe 49.855 MW. Paralelisht, 2 parqe të tjerë janë në fazë edhe më të avancuar.

Më konkretisht, bëhet fjalë për centralet “Blue 1” dhe “Blue 2”, me një fuqi totale të instaluar prej 100 MW, që aktualisht po licencohen nga Enti Rregullator i Energjisë në aktivitetin e prodhimit të energjisë. Aktualisht, energjia diellore është pak e shfrytëzuar në vendin tonë, teksa kapaciteti total i instaluar është vetëm 23 MW.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.