ARRSH, dy tenderë për korridorin VIII – 133.3 mln lekë për projektimin e Elbasan-Lekaj dhe Bushtricë-Maqedoni e Veriut

Autoriteti Rrugor Shqiptar planifikon hapjen e 2 procedurave tenderuese për projektimin e 2 akseve rrugore që do të jenë pjesë e Korridorit 8. Aksi i parë është Elbasan – Lekaj, me një fond limit prej 83.3 mln lekë. Ndërkohë që, segmenti i dytë është ai që do të lidhë Bushtricën, me pikën doganore me Maqedoninë e Veriut, me një fond limit prej 50 mln lekësh.

Këto procedura tenderuese vijnë pas përfshirjes së këtij segmenti të rëndëisshëm rrugor në Rrjetin Ndëreuropian të Transportit TEN-T, nga Bashkimi Evropian. Ndërkohë që, në fillim të këtij viti u njoftua nisja e punimeve në aksin Elbasan – Qafë Thanë, pjesë e këtij korridori.

Gjatë inspektimit të punimeve, ministrja e Infrastrukturës dhe Energjisë, Belinda Balluku tha se këto janë 5 km e parë, teksa pika dalëse në Maqedoninë e Veriut e Korridorit 8 do të devijohet, për të shmangur lartësinë që krijon dalja në Qafë-Thanë, duke projektuar një pikë tërësisht të re, që përputhet edhe me projektin që po zbatohet në anën maqedonase.

Korridori VIII është konceptuar për të lehtësuar shkëmbimin e mallrave, njerëzve, naftës dhe furnizimeve me energji midis vendeve të BE-së, shteteve të Ballkanit që kanë dalje në Detin e Zi dhe Detin Kaspik dhe shteteve të Azisë Qendrore. Ai nis nga portet italiane të Barit dhe Brindizit, në portet e Durrësit e Vlorës dhe më pas vazhdon drejt Tiranës, Shkupit dhe Sofjes, duke mbërritur deri në portet e Burgasit dhe Varnës në Detin e Zi.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.