Austri: Van der Bellen rizgjidhet president

Sipas përllogaritjeve të Institutit SORA për televizionin publik austriak ORF 78-vjeçari Van der Bellen ka marrë mbi 78 % të votave duke u rizgjedhur kështu sërish president i Austrisë me shumicë absolute, që është e nevojshme në raundin e parë të presidencialeve për t’u zgjedhur dhe tani nuk ka më nevojë për zgjedhje balotazhi.

Të gjithë kandidatët e tjerë për president kanë mbetur shumë pas Van der Bellenit me vota. Kandidati që renditet i dyti i partisë populiste të djathtë FPÖ, Walter Rosenkranz ka marrë 18 % të votave. Ndërsa kandidatët e tjerë shënojnë kuota një shifrore. Rezultati zyrtar pritet të shpallet gjatë së hënës së sotme, sepse pritet të numërohen edhe votat e dërguara me postë.

Presidenti në Austri ka kryesisht detyra të përfaqësimit të vendit dhe zgjidhet çdo gjashtë vjet dhe asnjëherë më parë nuk ka pasur kaq shumë kandidatë për president si këtë herë. Krahas Van der Bellen ishin edhe gjashtë kandidatë të tjerë, katër prej të cilëve nga radhët e partive të kampit të djathtë dhe të gjithë burra.

Në Austri deri tani të gjithë presidentët, që kanë kandiduar për një mandat të dytë janë rizgjedhur. 78-vejçari Van der Bellen nuk sheh asnjë problem me moshën e tij të madhe dhe sipas tij ky post të jep forcë.

Partia konservatore ÖVP dhe ajo socialdemokrate hoqën dorë nga paraqitja e kandidatëve të tyre. Argumenti i tyre ishte, se në fushatën elektorale kundër presidentit aktual nuk do të kishin asnjë shans për të fituar dhe partitë preferonin më mirë t’i kursenin paratë e fushatës. DW

E . S  / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.