Autobusët ikonik të Londrës drejtë elektrifikimit – Kryeqyteti me objektiv ‘emetimin zero’ deri në 2034

Përpjekja e Londrës për të patur një flotë autobusësh plotësisht me emetim zero deri në vitin 2034 ka kaluar në një tjetër stad.

Nëse provat dhe testimet janë të suksesshme, atëherë autobusi ieTram së shpejti do të dalë në rrugët e lagjes Bromley të Londrës juglindore në formën e numrit 358.

Transporti për Londrën (TFL) tashmë është angazhuar për të siguruar që të gjitha automjetet e reja të kenë emetim zero dhe me fonde të shtuara mund të çojë përpara objektivin nga 2034 në 2030.

Pas lançimit vitin e kaluar të 20 autobusëve me hidrogjen dykatësh për të testuar teknologjinë me rreze më të gjatë në mjedisin urban, dizajni më i fundit i ngjan një tramvaji. Ai do të ketë pajisje të përmirësuara për klientët, veçoritë më të fundit të sigurisë së autobusëve dhe do të ruajë ngjyrën ikonë të kuqe të Londrës.

Irizar, prodhuesi spanjoll, thotë se kombinon “lehtësinë e aksesit dhe konfigurimin e brendshëm të një tramvaji me fleksibilitetin e një autobusi të qytetit”.

Drejtori Menaxhues i Irizar e-mobility Inigo Etxeberria shtoi: “Londra po investon shumë në zgjidhje të qëndrueshme të transportit publik dhe ne jemi të nderuar që Irizar e-mobility të luajë një rol në këtë qëllim.

“Gara jonë teknologjike vazhdon dhe ky operacion do të bëjë që kompania jonë të nisë rrugën e parë të karikimit super të shpejtë në Londër, në përputhje me standardet e larta të vendosura nga TfL.”

Tani ka më shumë se 850 autobusë me emetim zero në Londër, shumica e të cilëve mund të karikohen në garazhe vetëm brenda natës.

Autobusi i ri i Londrës do ta transformojë këtë. Nuk ka më netë pa gjumë për shoferët që shqetësohen për karburantin e mjaftueshëm në mëngjes.

ieTram përdor një strukturë të ngjashme me krahun e quajtur pantograf, i cili i jep një karikim të shpejtë dhe me fuqi të lartë automjetit përmes çatisë së tij. Ato do të vendosen në çdo skaj të rrugës dhe do të kenë nevojë për më pak se 10 minuta karikim.

Koha e shkurtër e rimbushjes dhe distanca më e gjatë që mund të mbulojë çdo autobus do të thotë se nevojiten më pak autobusë për të ofruar të njëjtin nivel shërbimi, duke lejuar që burimet të riinvestohen në zona të tjera të rrjetit.

Nënkryetari i Bashkisë për Transportin, Seb Dance, tha: “Qytetarët e Londrës meritojnë të marrin frymë të pastër dhe si pjesë e punës sonë për të trajtuar rreziqet e dyfishta të ndotjes së ajrit toksik dhe emergjencës klimatike, jam i kënaqur që kjo teknologji e re po përdoret në autobusë në jug të Londrës.

“Transformimi i flotës së autobusëve të Londrës është një pjesë e rëndësishme e objektivit të Kryetarit të Bashkisë për ta çuar Londrën në zero neto deri në vitin 2030 dhe synimi i tij për të ndërtuar një Londër më të mirë, një qytet më të drejtë, më të gjelbër dhe më të begatë për të gjithë.”

N.Xh / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.