Autoritetet: 1 % e djemve të Shqipërisë, me gomone në Angli! Deri më tani, 12 mijë shqiptarë kanë emigruar ilegalisht në Britani

Autoritetet britanike shprehen të shqetësuar për nivelin e lartë të emigracionit ilegal nga Shqipëria. Duke cituar autoritetet britanike, ‘Sky’ shkruan se numri i emigrantëve shqiptarë që po kalojnë me gomone drejt Britanisë ka njohur një rritje eksponenciale vitin e fundit.

Duke iu referuar të dhënave të Komitetit të Çështjeve të Brendshme, në artikull evidentohet se deri më tani janë 12 mijë shqiptarë, nga të cilat 10 mijë djem të rinj. Arsyeja kryesore, sipas autoriteteve është se bandat kriminale shqiptare kanë fituar terren në Francë duke mundësuar kalimet në Britani me gomone të vogla.

Sipas Dan O’Mahoney nga Komiteti i Çështjeve të Brendshme, këtë vit, bëhet fjalë për një emigracion që varion nga 1 deri në 2 përqind të popullsisë mashkullore të të gjithë Shqipërisë.

Fluksi i lartë migrator ka bërë që qendrat e azilit në Britani të jenë të mbingarkuara me më shumë se 200 % të kapacitetit të tyre.

Ndërsa disa prej atyre që mbërrijnë në Britani kërkojnë azil ose mund të jenë viktima të skllavërisë moderne, disa të tjera lirisht po luajnë nëpër sistem, duke u zhdukur menjëherë sapo mbërrijnë në Britani.

Nga ana tjetër, edhe pse ka një fluks të lartë të mbërritjeve në Britani nga ana e shqiptarëve, evidentohet se vetëm një përqindje shumë e vogël e tyre arrin të përfitojë azilin.

SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.