Banka e Anglisë rrit normat e interesit në 4.25% – Perspektiva për ekonominë, pak e përmirësuar. Nuk parashikohet recesion teknik

Banka e Anglisë ka rritur normat e interesit me një çerek pikë përqindjeje në 4.25% në përgjigje të inflacionit më të lartë se sa pritej në Mbretërinë e Bashkuar dhe shenjave se ekonomia po ecën më mirë se ç’duhej.

Në një dy javë shqetësimi të shtuar në tregjet financiare globale, komiteti i politikës monetare të Bankës votoi me një shumicë prej shtatë me dy për të rritur normën bazë për të 11-tën herë radhazi.

Vendimi vjen pas një kërcimi të papritur në normën vjetore të inflacionit në Mbretërinë e Bashkuar në shkurt në 10.4%, nga 10.1% në janar, e nxitur nga përshpejtimi i çmimeve të ushqimeve me ritmin më të shpejtë në 45 vjet. Banka tha gjithashtu se perspektiva për ekonominë është pak e përmirësuar dhe nuk po parashikon më një recesion teknik, ku ekonomia tkurret për dy tremujorë radhazi.

Bankat qendrore në të dy anët e Atlantikut kanë vijuar me rritjen e normave, pavarësisht frikës për kolapsin e Silicon Valley Bank dhe ndërmjetësimit të qeverisë zvicerane për shpëtimin e Credit Suisse nga huadhënësi rival i saj UBS. Rezerva Federale e SHBA rriti normën e saj bazë të interesit të mërkurën me një çerek pikë përqindjeje në një interval prej 4.75% deri në 5%.

Komiteti i Politikës Monetare tha se rritja në ekonominë britanike po mbahej më mirë se sa pritej, pasi paneli prej nëntë anëtarësh për përcaktimin e normës i çoi kostot e huamarrjes në nivelin më të lartë që nga viti 2008.

Megjithatë, Komiteti sinjalizoi se inflacioni pritej ende të bjerë gjatë muajve të ardhshëm në linjë me çmimet globale të energjisë. Në një sinjal për planet e tij të ardhshme, komiteti tha se “nëse do të kishte prova të presioneve më të vazhdueshme, atëherë do të kërkohej shtrëngim i mëtejshëm në politikën monetare”.

Dorina Kurtaj/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.