Banka e Shqipërisë jep miratimin paraprak për bashkimin me përthithje të bankave OTP-Alpha

Këshilli Mbikëqyrës i Bankës së Shqipërisë ka dhënë miratimin paraprak për bashkimin me përthithje të Bankës OTP Albania sh.a. me Bankën Alpha Albania sh.a.Ky vendim i hap rrugë procesit të shkrirjes së Alpha Bank dhe bashkimit të strukturave ekzistuese me hungarezen OTP. Marrëveshja për shitjen e bankës greke te hungarezët u njoftua fundvitin e kaluar. Në këtë mënyrë, sektori bankar do të ketë 11 banka.

Në këtë mbledhje, Këshilli Mbikëqyrës miratoi edhe Strategjinë Afatmesme të Zhvillimit të Bankës së Shqipërisë për periudhën 2023- 2025, buxhetin e Bankës së Shqipërisë për vitin 2023 dhe buxhetin orientues afatmesëm për vitet 2024 – 2025. Një vendim tjetër i miratuar është edhe miratimi i një ndryshimi në rregulloren “Mbi minimumin e rezervës së detyruar mbajtur në Bankën e Shqipërisë nga bankat”, e ndryshuar që synon të krijojë hapësira që bankat tregtare të administrojnë më mirë nivelin e kapitalit që ato kanë në dispozicion.

 

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.