Banka qendrore e Turqisë lehtëson politikat e saj – Ulen normat e interesit pas tërmeteve që tronditën vendin

Banka qendrore e Turqisë pritet të ulë normat e saj të interesit me 50 pikë bazë në 8.5% këtë javë, pas tërmeteve që vranë më shumë se 41 mijë persona në juglindje të vendit.

Vitin e kaluar, banka qendrore përfundoi një cikël lehtësimi me 500 pikë bazë,  me të cilin ajo filloi të përballej me një ngadalësim të ekonomisë dhe e mbajti të qëndrueshme normën e saj në 9% në dhjetor dhe janar.

Një sondazh i Reuters me 17 ekonomistë tregoi se banka qendrore do të ulë normën e saj bazë me 50 pikë bazë për të minimizuar ndikimin ekonomik të tërmetit. Nëntë ekonomistë prisnin një ulje të normës bazë deri në 200 pikë bazë, ndërsa tetë prisnin që banka qendrore të qëndronte ‘e qetë’.

Turqia dhe Siria fqinje u tronditën nga tërmeti shkatërrues i 6 shkurtit, që la miliona njerëz në nevojë për ndihmë humanitare, me shumë të mbijetuar të mbetur të pastrehë në motin e ftohtë të dimrit.

Grupet e biznesit dhe ekonomistët shprehen se tërmeti mund t’i kushtojë Ankarasë deri në 100 miliardë dollarë për të rindërtuar banesat dhe infrastrukturën, duke ulur një deri në dy pikë përqindje nga rritja ekonomike këtë vit.

Barclays tha se fokusi është në pasojat ekonomike dhe politike të tërmetit, duke shtuar se ata ruajtën pritshmëritë e tyre që banka qendrore të ruajë normën e saj të qëndrueshme në 9%.

Mesatarja e 14 ekonomistëve që iu përgjigjën pyetjes për normën bazë në fund të këtij viti, tregoi se pritet shtrëngim nga banka qendrore. Ndërsa parashikimet varionin nga 6% në 45%, mesatarja ishte 14.5% për normën e politikës së fundvitit, sipas sondazhit. Ekonomistët kanë thënë se ecuria e politikës monetare në fund të këtij viti është e paparashikueshme për shkak të pasigurisë rreth zgjedhjeve që janë planifikuar të mbahen në muajin qershor.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.