Bashkitë nisin punën për pastrimin e plazheve – Agjencia Kombëtare e Bregdetit hap tenderin 162.3 milionë lekë për 6 prej tyre

Për pastrimin e ambienteve publike pranë zonave bregdetare, Agjencia Kombëtare e Bregdetit ka hapur tenderin për 6 bashki. Tenderi i hapur mbi kufirin e lartë monetar me vlerën e 162.3 milionë lekëve do të jetë i ndarë në dy lote.

Për shërbimin e Pastrimit të Zonës Bregdetare për Bashkitë Durrës, Kavajë, Rrogozhinë fondi i garantuar është 91,4 milionë lekë pa TVSH. Ky shërbim konsiston në grumbullimin, largimin dhe transportin e mbetjeve të ngurta urbane. Zbrazjen e kontenierëve me makinën e përshtatshme teknologjike të përcaktuar, mbledhjen dhe largimin e mbeturinave dhe fshirjen me fshesë me dorë të sipërfaqeve.

Në këtë çmim përfshihet gjithashtu edhe dezifektimi në përfundim, me pluhur gëlqereje brenda çdo kontenieri. Në këtë shërbim përfshihet edhe mirëmbajtja dhe pastrimi i trotuareve dhe shesheve nga ora 18:00 deri 24:00.  Për këtë zonë do të përdoret një numër personeli prej 120 personash. Pastrimi do të zhvillohet në Bashkinë e Durrësit konkretisht tek Gjiri I Llazit, Currilla Kallm dhe Plazhi i Madh. Për Bashkinë e Rrogozhinës në Spille dhe për Kavajën në Golem-Qerret dhe Karpen.

Loti 2 me fond limit 70,8 milionë lekë do të përfshijë shërbimin e pastrimit të zonës Bregdetare për Bashkitë Vlorë, Himarë, Sarandë. I njëjti shërbim si për 3 bashkitë e para do të ofrohet edhe për këto bashki nga largimi I mbetjeve urbane deri te pastrami I trotuareve. Për këto bashki do të përdoren 14 mjete teknologjike  dhe një personel prej 125 personash.

Konkretisht për Bashkinë Himarë pastrimi do të kryhet në Palasë, Dhërmi-Drimadhë, Jalë, Livadhë, Himarë, Llamanë, Qeparo, Borsh, Bunec, Lukovë.

Për të 6 bashkitë pastrimi do të zhvillohet për periudhën kohore  15 qershor deri në 15 shtator. Në tender thuhet se mbeturinat dhe papastërtitë si në kazanët por dhe në ambientet publike nuk do të lejohen asnjë moment pa u pastruar  duke garantuar kështu një ambient të pastër për sezonin turistik.

Marinela Lina / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.