Bashkitë nuk kursehen për dekoret e fundvitit – 405 mijë euro 25 prej tyre. Durrësi kryeson me shpenzimet

Festat e fundvitit po afrojnë dhe siç do herë 61 bashkitë e vendit zbukurojnë sheshet kryesore të qyteteve. Pavarësisht inflacionit të lartë dhe krizës ekonomike që vendi po kalon, bashktië nuk janë kursyer në dekore.

Vetëm 40% e bashkive ose 25 prej tyre  janë treguar transparente në publikimin e tenderave përkatëse për shpenzimet e kryera.

Bashkia e Durrësit ka shpenzuar 129 mijë euro për dekoracionet e ndryshme në qytet si dritat, pema e vitit të ri, zbukurime institucioneve etj. Fill pas Durrësit qëndron Korça me 38 mijë euro shpenzime si për qendrën e qytetit por edhe për pazaret tradicionale dhe Himara me 35 mijë euro.

Gramshi ka blerë 26 mijë euro zbukurime të ndryshme ndërsa Kamza ka shpenzuar për dekorimin e rrugëve por dhe institucioneve 21 mijë euro. Të tjera bashki përfshijnë blerje që nuk I kalojnë shpenzimeve mesatare që një bashki ka kryer këtë vit.

As gjysma e bashkive të vendit tonë kanë harxhuar për dekorimet e qyteteve për 2022-2023 rreth 405 mijë euro.

Marinela Lina /  SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.