“Bashkitë, pak buxhet për ndryshimet klimatike” -Muço: Kryesisht shpenzimet shkojnë për paga. Duhet më tepër ndërgjegjësim

Ola Mitre / SCAN

“Shpenzimet e bashkive për mbrojtjen e mjedisit dhe minimizimin e risqeve që vijnë nga ndryshimet klimatike janë modeste, ndonëse nevoja për investime në këtë drejtim është e madhe”. Ky është një prej përfundimeve paraprake, të Raportit të Monitorimit të Buxhetit për Mjedisin, fokusuar tek investimet për përshtatshmërinë ndaj ndryshimeve klimatike, në bashkitë Elbasan, Librazhd dhe Prrenjas për periudhën 2022 -2024. Klodian Muço, një nga ekspertët që ka punuar për hartimin e raportit thotë se vlerat buxhetore, që shkojnë realisht në këtë drejtim janë shumë të vogla.

“Te Bashkia Elbasan kemi 9.8% të buxhetit, që në aparencë shkon për mjedisin, por kur kalon në zëra të detajuar shikon që nuk ka fonde specifike për mbrojtjen e mjedisit apo për ndryshimet klimatike. Kur kalojmë te bashkitë që janë edhe më të vogla, atëhere ky buxhet reduktohet në mënyrë të ndjeshme. Për të gjitha këto bashki, por që duket se është një fenoment shqiptar, bashkitë nuk respektojnë detyrimet ligjore, që kanë të bëjnë me informimin e vazhduar të qytetarëve, ndërgjegjësimin e qytetarëve përsa i përket faktorëve të ndryshimit klimatik dhe të mbrojtjes së mjedisit”, – thotë Muço.

Po ashtu, ka rezultuar se shpenzimet kryesore bëhen për paga personeli, ndërkohë që investimet kapitale apo ato për ndërgjësimin e qytetarëve mbi risqet që vijnë nga ndryshimet klimatike janë thuajse inekzistente.

“Nuk kemi asgjë kundër që qytetarët të punojnë në administratën publike, por që në shumicën e rasteve nuk mjafton të paguash njerëz për të mbrojtur mjedisin. Nevojitet më tepër ndërgjegjësim i qytetarëve, t’u bëhet e qartë se çfarë do të thotë “ndryshime klimatike”, se çfarë do të thotë “mjedis”, se cilat janë pasojat te mjedisi dhe kam përshtypjen, që nëse kjo ndodh dhe ju kushton shumë pak bashkive, qytetarët do fillonin që t’iu kërkonin shumë më tepër llogari Këshillave Bashkiakë, në momentet kur ata hartojnë projektbuxhetet e tyre”, – thotë Muço.

Bujqësia, blegtoria, si dhe mbledhja e frutave dhe bimëve në natyrë janë sektorët më të rrezikuar në këto bashki, duke cenuar drejtpërdrejt familjet që i bazojnë të ardhuart e tyre te këta sektorë. Ndaj, rekomandimet e raportit të hartuar nga organizata All Green Centre, në kuadër të proejktit “Budget 4 Balance”, të mbështetur financiarisht nga Bashkimi Evropian, fokusohen te rritja e buxheteve në drejtim të mbrojtjes së mjedisit, si dhe rritjes së ndërgjegjësimit qytetar.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.