Bashkitë “refuzojnë” paratë për përmbytjet dhe zjarret – Rama: Skandaloze, ka njësi që nuk kanë marrë kokërr leku
Elisabeta Dosku/ SCAN
Pavarësisht fondit në dispozicion për emergjencat civile, që përdoret nga bashkitë në raste përmbytjesh, zjarresh, apo për shërbimet sociale, një pjesë e mirë e njësive nuk kanë përfituar asnjë qindarkë, për shkak se nuk kanë aplikuar. Gjatë një takimi me kryetarët e bashkive në të gjithë vendin, kryeministri Edi Rama e ka konsideruar si skandaloze këtë situatë, në kushtet kur nevojat e njësive të vetëqeverisjes vendore janë dhe më të larta se fondet në dispozicion.
“Ne kemi vënë fonde në dispozicion dhe ka bashki që s’kanë marrë kokërr leku se nuk kanë çuar një projekt, kjo është skandaloze. 31 mijë persona shërbehen nga ky fond, është e paimagjinueshme që mos absorbohet ky fond kur nevojat që ju keni janë shumë më të mëdha se sa mund të mbulojnë këto shuma. Me çfarë merreni ju? Nuk arrij ta kuptoj. Aty ku ka vëmendje dhe përqendrim këto fonde nuk mjaftojnë, aty ku s’ka nuk kërkohen.
Nga ana tjetër, kryeministri u ndal edhe në procesin e legalizimeve, duke i nxitur bashkitë që të mos krijojnë asnjë pengesë për qytetarët.
“Kemi shtruar të gjithë rrugën për akses në legalizime, në mënyrë që njerëzit të kenë bashkinë në krah dhe procesi të bëhet shumë më i lehtë dhe shumë më pak i penguar nga ngarkesa e madhe e kadastrës. Çfarë presim që ta përshpejtojmë këtë proces? Bashkia më e suksesshme me tërmetin, bashkia e Shijakut është model për procesin e legalizimeve. Nuk po ju them të arrini Shijakun, por luftoni për vendin e dytë. Tek legalizimet duhet shumë fokus, nuk ka justifikim.”
Fondi i kushtëzuar për mbrojtjen civile për vitin 2024 ka qenë në vlerën e 8 milionë eurove, dhe aktualisht 60 % fondit është në dispozicion, i pa shfrytëzuar, për këtë arsye u bëhet apel bashkive që të aplikojnë dhe ta përdorin për dëmshpërblimet që mund të nevojiten si pasojë e përmbytjeve. Po ashtu bashkitë nxiten të aplikojnë edhe për fondin social, pasi aplikimet do të jenë të hapura deri më 25 tetor.
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.