BE ankohet për reklamimin e kriptove – Instagram, YouTube, TikTok dhe Twitter bëhen objekt kritikash
Instagram, YouTube, TikTok dhe Twitter mund të përballen me veprime rregullatore pasi grupi europian i konsumatorëve, BEUC, u ankua tek Komisioni Europian dhe autoritetet e konsumatorit, për faktin se platformat online lehtësojnë promovimin mashtrues të aseteve kripto.
Rregullatorët amerikanë që paditin platformat e kriptove Coinbase dhe Binance, së bashku me falimentimin e vitit të kaluar të FTX, kanë ngjallur shqetësime për mbrojtjen e konsumatorit në lidhje me asetet kripto, si bitcoin dhe eter.
Bashkimi Europian muajin e kaluar miratoi grupin e parë gjithëpërfshirës në botë të rregullave për rregullimin e kriptoaseteve.
BEUC në ankesën e tij tha se përhapja e reklamave mashtruese të aseteve kripto në platformat e mediave sociale është një praktikë e padrejtë tregtare pasi i ekspozon konsumatorët ndaj dëmeve serioze, siç është humbja e shumave të konsiderueshme parash, dhe se një gjë e tillë po ndodhte nëpërmjet reklamave dhe influencuesve.
Rrjetit të Bashkëpunimit për Mbrojtjen e Konsumatorit i kërkohet që të detyrojë platformat në internet që të miratojnë politika më të rrepta reklamimi për kripto – t dhe të marrin masa për të parandaluar ndikuesit që të mashtrojnë konsumatorët. Rrjeti duhet të informojë më pas Komisionin Europian për efektivitetin e këtyre masave.
Grupi u bëri thirrje autoriteteve europiane të konsumatorëve që të bashkëpunojnë me Autoritetet Mbikëqyrëse Europiane për shërbimet financiare, për të siguruar që platformat të përshtatin politikat e tyre të reklamimit për të parandaluar promovimin mashtrues të kriptove.
Grupet e konsumatorëve në Danimarkë, Francë, Greqi, Itali, Lituani, Portugali, Sllovaki dhe Spanjë gjithashtu firmosën ankesën.
Dorina Kurtaj / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.