Biden fal kreditë e papaguara të studentëve: 10 mijë dollarë për huamarrësit me të ardhura vjetore nën 125 mijë dollarë

Presidenti i SHBA Joe Biden deklaroi se qeveria do të falë 10,000 dollarë kredi studentore për shumë të diplomuar të universitetit të ngarkuar me borxhe, një veprim që mund të rrisë mbështetjen për kolegët e tij demokratë në zgjedhjet e Kongresit të nëntorit, por gjithashtu mund të nxisë inflacionin.

Anulimi i borxhit do të çlirojë qindra miliarda dollarë për shpenzime të reja konsumatore që mund të synojnë blerjen e shtëpive.

“Duke rifilluar pagesat e kredisë studentore në të njëjtën kohë kur ofrojmë lehtësim, ne po ndjekim një kurs ekonomikisht të përgjegjshëm. Si pasojë, rreth 50 miliardë dollarë në vit do të fillojnë të kthehen në Thesar. Ekspertë të pavarur janë dakord që këto veprime të marra së bashku do të ofrojnë përfitime reale për familjet pa efekt domethënës në inflacion”, tha Biden ndërsa njoftoi masat në Shtëpinë e Bardhë.

Shumë demokratë kishin kërkuar që Biden të falte deri në 50,000 dollarë për çdo student, por gjithsesi e mbështetën vendimin. Republikanët, që kërkojnë të rimarrin kontrollin e Kongresit në nëntor, e kundërshtojnë masën, duke argumentuar se është e padrejtë pasi do të ndihmojë në mënyrë të zhdrejtë njerëzit që fitojnë të ardhura më të larta.

Konsumatorët amerikanë kanë një borxh masiv prej 1.75 trilion dollarësh në kredi studentore, shumica e të cilave mbahet nga qeveria federale.

Administrata e Biden do të zgjasë një pauzë të lidhur me pandeminë COVID-19 në shlyerjen e kredisë studentore deri në fund të vitit, ndërsa do të falë 10,000 dollarë borxh studentor për huamarrësit, të ardhurat e të cilëve janë nën 125,000 dollarë në vit, ose 250,000 dollarë për një çift të martuar, tha Shtëpia e Bardhë. Falja mund të ndikojë automatikisht në 8 milionë huamarrës, tha Departamenti i Arsimit, ndërsa të tjerët do të duhet të aplikojnë për falje. Bilancet e huamarrësve janë ngrirë që nga fillimi i shpërthimit të COVID-19, pa asnjë pagesë të kërkuar për shumicën e kredive federale studentore që nga marsi 2020.

Qeveria po fal gjithashtu deri në 20,000 dollarë borxh për marrësit e granteve federale, që llogariten rreth 6 milionë studentë nga familje me të ardhura të ulëta.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.