Bie ndjeshëm shitja e telefonave celularë në Kinë – Viti 2022 regjistroi nivelin më të ulët të blerjeve në një dekadë

Shitjet e smartfonëve në Kinë, pësuan një rënie rekord në vitin 2022, duke rënë me 13% duke shënuar nivelin më të ulët në një dekadë, pasi kontrollet e COVID dhe një ekonomi e ngadalësuar ulën kërkesën e konsumatorit.

Numri i përgjithshëm i pajisjeve të dërguara ishte 286 milionë, nga 329 milionë në vitin 2021. Ky është vëllimi më i ulët i shitjeve që nga viti 2013 dhe hera e parë që atëherë, që shitjet vjetore kanë rënë nën 300 milionë. Kontrollet e rrepta kundër COVID-19 rënduan shumë mbi ekonominë kineze vitin e kaluar, por Pekini filloi të lehtësojë kufizimet në dhjetor, duke rritur konsumin.

Ekspertët komëbngulin se politika e rreptë e kontrollit të pandemisë ka rezultuar në kursime historikisht të larta familjare pasi shpenzimet e konsumatorit u bënë konservatore.

Prodhuesi i celularëve Android Vivo ishte marka më e shitur në vitin 2022, me një pjesë tregu prej 18.6%. Dërgesat e saj totale ranë 25.1% nga viti në vit.

“Huawei Technologies” u rendit si marka e dytë më e shitur, me dërgesat që u rritën më shumë se 34%, megjithëse nga një bazë e ulët. Apple Inc ishte marka e tretë më e shitur e telefonave në vitin 2022, e lidhur me Oppo, duke u ngjitur nga vendi i katërt në vitin e kaluar. Shitjet e përgjithshme të Apple ranë me 4.4% në bazë vjetore, ndërsa të gjithë rivalët e tjerë, me përjashtim të Huawei, regjistruan shitje me dy shifra.

Në përgjithësi, rënia e shitjeve të telefonave celularë në Kinë reflektoi performancën e sektorit në nivel global. Në vitin 2022, dërgesat globale të smartfonëve arritën në 1.2 miliardë, niveli më i ulët që nga viti 2013 dhe një rënie nga viti në vit prej më shumë se 11%.

Një raport i veçantë tregon se në tremujorin e katërt të 2022, Apple shiti 16.4 milionë pajisje, 24% më pak nga një viti më parë. Kjo krahasuar me një rënie prej 37.3% të dërgesave nga Xiaomi dhe rënie prej 14.1% e Huawei gjatë të njëjtit tremujor.

Dorina Kurtaj / SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.