Bie prodhimi i qumështit: 4 mijë tonë më pak se në 2020-ën, vetëm 12 % shkon për konsum!
Sasia e qumështit të grumbulluar në të gjithë vendin ka pësuar rënie gjatë vitit që lam pas. Refeuar shifrave zyrare të INSTAT, në vitin 2021, sasia gjithsej e qumështit të grumbulluar rezulton rreth 115 mijë ton, ndërkohë që në vitin 2020 regjistrohej në 119 mijë tonë, duke bërë që rënia të jetë me afro 4 mijë tonë.
Ky nuk është një lajm i mirë për industrinë e përpunimit të qumshtit pasi pjesa më e madhe e prodhimit shitet në kanale jo formale. Sipas llojit, sasia e grumbulluar e qumështit të lopës është rreth 94 mijë tonë, sasia e grumbulluar e qumështit të deles është 13 mijë tonë dhe sasia e grumbulluar e qumështit të dhisë është rreth 8 mijë tonë.
Krahasuar me vitin 2020, sasia e grumbulluar e qumështit të lopës paraqitet me rënie 7,4 %, ndërsa sasia e grumbulluar e qumështit të deles dhe dhisë paraqitet me rritje përkatësisht me 26,3 % dhe 8,0 %.
Nga sasia gjithsej e qumështit të grumbulluar, rreth 14 mijë tonë apo rreth 12 për qind është përdorur për prodhimin e qumështit për konsum njerëzor, pjesa tjetër shkon për përpunim.
Sa i takon nënprodukteve të qumështit, sasia e prodhuar e djathit sipas llojit të qumështit pësoi rritje me 12,0 % dhe sasia e prodhuar e gjalpit pësoi rënie me 3,4 %, krahasuar me një vit më parë. Ndërkohë, rënie me 6,1 % shënoi sasia e prodhuar e djathit të përpunuar (djathë i shkrirë), krahasuar me një vit më parë.
Elisabeta Dosku / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.