Bizneset “zhyten” në borxhe ndaj tatimeve – Rriten detyrimet, TVSH-ja dhe sigurimet shoqërore në “listën e zezë”

Detyrimet e bizneseve ndaj administratës tatimore përgjatë vitit 2022 janë rritur me  11.8 miliardë lekë apo 103 milionë euro në krahasim me fillimin e vitit ose thënë ndryshe është stoku i detyrimeve është rritur me 9%,  50% e të cilit është krijuar nga vetëm dy tatimpagues.

Referuar të dhënave zyrtare nga Drejtoria e Përgjithshme e Tatimeve rezulton se gjendja e stokut të detyrimeve që sipërmarrjet duhet të paguajnë arrin në 146.8 miliardë lekë  apo 1.28 miliardë euro. Rritja e këtij stoku është shqetësues sidomos në një vit kur është vënë në jetë reforma antiinformalitet nga ana e administratës tatimore, çka mesa duket nuk ka funksionuar për këtë segment.

Nga të dhënat e rezulton se principali i detyrimeve tatimore të akumuluara përben rreth 61% të shumës totale të detyrimeve tatimore, ndërkohë që pjesa tjetër e këtyre detyrimeve 39% e mbetur përbëhet nga penalitetet dhe kamatëvonesat. Në stokun e detyrimeve të papaguara në afat, të ndarë sipas llojit të tatimit, TVSH zë peshën më të madhe në stokun e borxhit me 35% në vlerë 52,1 miliardë lekë, ku biznese kryesisht të import-eksportit nuk kanë paguar sipas afateve ligjore 20 %-shin për mallrat.

E ndjekur nga Tatim Fitimi me 29% në vlerë 42,7 miliardë lekë, zëri Të Tjera me 16%, Sigurimet Shoqërore & Shëndetësore me 14% në vlerë 20.5 miliardë lekë, Tatimi në Burim me 4, TAP me 1% në vlerë dhe DIVA me 0.3% . Rritja më të madhe të detyrimeve përgjatë këtij viti ka ardhur nga TVSH-ja, tatim fitimi dhe sigurimet shoqërore.

Edhe pse skema e pensioneve është defiçitare, duket se shmangia e pagesave nga bizneseve e përkeqëson edhe më shumë atë.  Sa i takon moshës së borxhit, rezulton që të jetë me vjetërsi mbi 2 vjet në vlerë 112,7 miliardë lekë është 77% ndaj totalit të stokut.

Elisabeta Dosku/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.