Bletët në “aksion”, sa është rritur prodhimi i mjaltit? – Shkodra “mban kampion”, Durrësi qarku me prodhimin më të ulët
Pavarësisht se deri më tani ka qenë një sektor tërësisht i pa rregulluar, prodhimi i mjaltit në vendin tonë ka ardhur duke u rritur. Referuar Vjetarit Statistikor Rajonal të INSTAT 2022, për vitin 2021 është prodhuar 5.1 për qind mjaltë krahasuar me vitin paraardhës. Qarqet ku është regjistruar prodhimi më i lartë, janë Shkodra me 18.9 për qind dhe Vlora me 15.3 për qind të prodhimit të përgjithshëm. Qarku me prodhimin më të ulët është Durrësi, me 2.9 për qind.
Ndërsa referuar shifrave zyrtare të Ministrisë së Bujqësisë, edhe për vitin 2022, prodhimi i mjaltit ka ardhur në rritje me rreth 6 për qind, duke e çuar prodhimin total në afro 5 mijë ton mjaltë. Përgjatë vitit që lamë pas, nga fondi total prej 5.1 miliardë lekësh i vënë në dispozicion të mbështetjes së fermerëve përmes skemave kombëtare, bletaria përfitoi 7 për qind të tyre dhe u mbështetën në total 2889 bletarë.
Sipas të dhënave të Ministrisë së Bujqësisë, aktualisht janë rreth 12 000 bletërritës në të gjithë vendin, prej të cilëve rreth 3 mijë kanë mbi 50 koshere. Numri i zgjojeve (koshereve) është rritur në 402 mijë koshere, nga 239 mijë koshere që ishin në 2012 dhe po ashtu prodhimi i mjaltit “Made in Albania” ka ardhur në rritje me rreth 2200 ton në një dekadë. Vlera e kapitalit të këtij sektori është afro 72 milionë euro, ndërsa ka njohur një rritje të lartë në dekadat e fundit.
Aktualisht Ministria e Bujqësisë po punon në nivel rajonal me vendet e CEFTA për të bërë të mundur hapjen e eksporteve me procedurë të thjeshtuar dhe një dokumentacion të unifikuar mes vendeve të rajoni. Së shpejti hyn në fuqi edhe ligji i dedikuar për bletarinë, i cili synon të rregullojë këtë sektor, duke detyruar bletarët që të regjistrohen dhe të përditësojnë të dhënat mbi numrin e zgjojeve, vendqëndrimet e parqeve dhe lëvizjen e tyre. Vëmendje e veçantë i kushtohet regjistrit të mbretëreshave.
Ecuria e prodhimit të mjaltit
Viti 2021 +5.1 %
Viti 2022 + 6 %
Qarku me prodhimin më të lartë Shkodra 18.9 %
Qarku me prodhimin më të ulët Durrësi 2.9 %
Elisabeta Dosku / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.