Bllokimi i biznesit, Shehaj tregon dokumentet e rregullta – Deputeti reagon përsëri: Publikon lejen e ndërtimit dhe aktin noterial të qirasë
Pas përplasjeve në Kuvend, Deputeti Agron Shehaj ka vijuar reagimet ndaj vendimit të Qeverisë për bllokimin e një biznesi të tij me argumentin se ai kryen aktivitetin në një ndërtesë pa lejë.
Përmes një postimi në rrjetet sociale, Shehaj këmbënguli se biznesi, ku janë të punësuar rreth 200 specialistë IT, ka nënshkruar një kontratë të rregullt qiraje të shoqëruar me akt noterial. Shehaj ka publikuar edhe lejen e ndërtimit të godinës, në një kohë që bën përgjegjëse autoritetet që lejojnë shkeljen e lejeve. Shehaj akuzon se bizneset nuk mund të dinë nëse një ndërtim ka shkelur apo jo lejen, por se janë autoritetet ato që kanë detyrimin ligjor ta bëjnë këtë.
Por nuk ka qenë i këtij mendimi Kreu i Qeverisë Edi Rama, i cili, po përmes një statusi në rrjetet sociale, tha se biznesi nuk duhet të ishte vendosur në një pallat të paligjshëm, ndërkohë që me shlejen e lejes së ndërtimit, vetë ndërtuesi ka bërë nul edhe vetë lejen.
Polemikat shpërthyen pasi deputeti demokrat Agron Shehaj, denoncoi këtë javë nga foltorja e Kuvendit se Qeveria ka dërguar policinë në ambjentet e një biznesi, si presion i pastër politik ndaj tij.
Me herët ka reaguar edhe Ministria e Brendëshme, sipas së cilës objekti është bllokuar pasi kishte ndërtuar 560 metra shtesë mbi lejen.
Deputeti i Partisë Demokratike Agron Shehaj në fjalën e tij në Kuvend ka akuzuar qeverinë se i ka mbyllur biznesin dhe kjo për shkak të hakmarrjes politike të Edi Ramës.
Lorenc Rabeta / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.