Bonot e thesarit bien në 4%, i afrohen depozitave bankare – Frenohet mbireagimi ndaj normave të interesit, konkurrencë nga bankat me oferta mbi 3%

Interesat e letrave me vlerë të Qeverisë kanë vijuar këtë javë trendin rënës, por në masë më të madhe këtë javë. Në ankandin e fundit bonot e thesarit me afat maturimi 12 mujor u blenë me normën mesatare 4.09%, duke ulur edhe më tej përqindjet e fitimeve për qytetarët e investitorët e tjerë. Në këtë mënyrë, normat e kthimit të letrave me vlerë të qeverisë po i afrohen normave të depozitave të sistemit bankar, ku gjenden në treg paketa 12 mujore në vlerën 3%.

Duket se këtë vit, ky treg ka ndalur mbireagimin ndaj rritjeve të njëpasnjëshme të normës bazë të interesit nga ana e bankës së Shqipërisë, duke reflektuar kështu zbutjen e faktorëve që sollën atë rritje aq të fortë gjatë fundit të vitit të shkuar. Faktorë që kryesisht kishin të bënin me pasiguritë e aktorëve të këtij tregu lidhur me ecurinë e inflacionit si dhe pritshmërive të larta për rritje të mëtejshme të normës bazë të interesave nga ana e Bankës së Shqipërisë. Por asnjë prej këtyre faktorëve nuk u materializua, gjë që duket se po normalizon normat e interesit të letrave me vlerë të Qeverisë.

Për vitin 2023, normat e interesave të letrave me vlerë po zbresin me shpejtësi në nivele shumë më të ulëta në raport me fundin e vitit 2022, kur ato u ngritën deri në 5.8%. Rënia nisi graduale në dhjetor, ndërkohë që u përshpejtua me nisjen e vitit 2023. Në ankandin e parë të këtij viti në 4 janar, ato u shitën me një normë mesatare prej 5.03% për të rënë me shpejtësi në ankandet e radhës.

Presionet rritëse ndaj bonove të thesarit duket se po zbehen edhe më tej, duke qenë se në lojë kanë hyrë edhe bankat.

Nga të dhënat zyrtare të Bankës së Shqipërisë për muajin janar, raportohen interesa deri në 3.5% për depozitat dy vjeçare. Po ashtu, të paktën 4 banka të nivelit të dytë propozojnë interesa mbi 3.5% për depozita me afat mbi 60 muaj. Për depozitat me afat 1 vjeçar gjenden në treg oferta deri 3%. Kjo tendencë ka shtyrë veçanërisht individët të transferojnë kursimet drejt depozitave me afat, duke u kthyer kështu në konkurrente të letrave me vlerë të qeverisë.

Lorenc Rabeta/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.