Bonot e thesarit vijojnë rënien, 4.44% këtë javë – Ndalet mbireagimi ndaj rritjeve të normës bazë të interesit nga ana e Bankës së Shqipërisë

Letrat me vlerë të Qeverisë kanë vijuar edhe gjatë shkurtit tendencën rënëse të shfaqur që prej fundit të vitit të shkuar. Në ankandin e kësaj jave, ato u u shitën me normën mesatare 4.44%, shumë larg vlerës prej thuajse 6% që prekun gjatë nëntorit të vitit të shkuar. Ato arritën pikën më të lartë në nëntor të vitit të shkuar duke shkuar në 5.8%, por duke shënuar rënie të njëpasnjëshme që prej atij momenti. Ato qëndruan mbi vlerën 5% gjatë dhjetorit, për të rënë nën këtë kuotë me fillimin e këtij viti.

Duket se këtë vit, ky treg ka ndalur mbireagimin ndaj rritjeve të njëpasnjëshme të normës bazë të interesit nga ana e bankës së Shqipërisë, duke reflektuar kështu zbutjen e faktorëve që sollën atë rritje aq të fortë gjatë fundit të vitit të shkuar. Faktorë që kryesisht kishin të bënin me pasiguritë e aktorëve të këtij tregu lidhur me ecurinë e inflacionit si dhe pritshmërive të larta për rritje të mëtejshme të normës bazë të interesave nga ana e Bankës së Shqipërisë.

Ndërkaq, ulja e inflacionit në muajt nëntor e dhjetor, dhe rikthimi i kërkesës së lartë për to, u materializuan me ulje të yield-it të bonos 12-mujore. Diferenca e yield-eve 1 vjeccare ndaj normës bazë po i afrohet mesatares historike, ndonëse distanca ndërmjet vlerave maksimale dhe minimale të primeve të kërkuara në ankande evidenton akoma shenja pasigurie.

Gjithësesi, rënia e pritshmërive për rritje të inflacionit, si në Shqipëri, ashtu edhe në vendet me të cilat ekonomia shqiptare ndërvepron më shumë, pritet të mbajnë të ulëta presionet rritëse të bonove të thesarit në vijim.

Lorenc Rabeta/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.