Bora “harron” Alpet e Italisë – Dëmet për sektorin e turizmit llogariten në 50 milionë euro

Në Itali këtë dimër në Alpe nuk ka borë dhe pritja e pafundme për të është transformuar në një krizë të madhe për sektorim e turizmit në rajonet e përfshira. Deri tani llogariten në 50 milion euro dëme të drejtpërdrejta në aktivitetet malore, për shkak të mungesës së borës. Një shifër që sipas autoriteteve lokale mund të jetë trefish më e lartë nëse merren në konsideratë dhe të ashtuquajturat dëme indirekte.

Ministria e financave premtoi se ekzekutivi do t’i përgjigjet urgjencës brenda dy-tre javësh dhe se për momentin po fokusohet veçanërisht në katër masa: tërheqja e fondit të Ministrisë së Turizmit për rezortet e skive, transferimi i këtyre burimeve në lokalitetet e dëmtuara; lirimin e fondeve Covid në pronësi të disa rajoneve; të bashkëpunojë ngushtë me Ministrinë e Punës për problemin e rrjetave të sigurimeve shoqërore; dhe në fund të punohet për një masë të qeverisë Monti, për të cilën 50% e buxhetit të bashkive duhej të kalonte në zona të pafavorizuara, ndërsa për momentin mund të mbetej në zonë.

Përfaqësuesit e sektorit shprehen se është urgjente të ndërhyhet për të mbështetur turizmin në këtë sektor, i cili vetëm në periudhën e dimrit kap vlerën e rreth 2 miliardë euro dhe punëson 65 mijë njerëz në mbi 14 mijë objekte akomodimi dhe institucione publike. Një sektor që përfshin nëntë rajone dhe 160 komuna, të cilat garantojnë mikpritjen për gati 6 milionë vizitorë dimërorë në Alpe.

Ndërkohë parashikimet, të cilat megjithatë mbeten pikërisht ashtu siç janë dhe janë çdo gjë tjetër veçse 100% të sigurta, paralajmërojnë reshje bore duke nisur nga kjo e dielë.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.