Bota mund të pësojë një ‘stuhi kibernetike’ katastrofike brenda 2 viteve!

Bota ka të ngjarë të përballet me një sulm katastrofik kibernetik brenda dy viteve, sipas një sondazhi të Forumit Ekonomik Botëror.

Phishing, ransomware, sulme DDos: të gjitha termat teknike që lidhen me krimin kibernetik që, mjerisht, do t’i dëgjojmë gjithnjë e më shpesh. Në fakt, sipas Forumit Ekonomik Botëror, sulmet kibernetike do të bëhen gjithnjë e më të shpeshta në vitet e ardhshme.

Ato do të prekin jo vetëm agjencitë qeveritare apo kompanitë e mëdha, por edhe organizatat që menaxhojnë të dhënat e konsumatorëve, pavarësisht nga madhësia e tyre, dhe vetë konsumatorët. “Ne duhet të përgatitemi për një stuhi kibernetike, megjithëse është vërtet e vështirë të kuptojmë se sa e keqe do të jetë”, paralajmëron Sadie Creese e Universitetit të Oksfordit.

Sipas 93% të ekspertëve të IT-së dhe 86% të drejtuesve të biznesit të IT-së të anketuar nga Forumi Ekonomik Botëror, paqëndrueshmëria aktuale gjeopolitike e bën të mundshme që një ngjarje informatike katastrofike të ndodhë në dy vitet e ardhshme.

Frika është veçanërisht e lartë për sektorët e infrastrukturës qendrore si energjia elektrike, prodhimi dhe transporti publik: sipas një sondazhi nga US SecurityScorecard, një kompani e specializuar në vlerësimet e sigurisë kibernetike, 48% e kompanive prodhuese do të ishin shumë të rrezikuara nga sulmi ndaj sistemit kompjuterik dhe kriminelët kibernetikë do të ishin të vetëdijshëm për këtë cenueshmëri.

Me pandeminë, krimi kibernetik është rritur dhe shumë kompani kanë pësuar më shumë sulme për shkak të vrimave të sigurisë së punës në distancë dhe rritjes së virtualizimit të të dhënave të ndjeshme me përdorimin e kompjuterit cloud.

Nëse, nga njëra anë, kërcënimet ndaj sigurisë globale të informacionit po rriten, nga ana tjetër, aftësia jonë për t’u mbrojtur kundër këtyre kërcënimeve po përmirësohet gjithashtu: për shembull, qasja Zero Trust po përdoret gjithnjë e më shumë, një strategji e mbrojtjes së rrjetit bazuar në idenë se të besosh është mirë, të mos besosh është më mirë. Ky model lejon aksesin e bazuar në kontekst te përdoruesi (duke verifikuar vendndodhjen e tij ose shërbimin e kërkuar), pa supozuar se, vetëm sepse janë futur një emër përdoruesi dhe fjalëkalim, lidhja është e sigurt.

Sipas ekspertëve të Forumit Ekonomik Botëror, për t’i rezistuar një sulmi të mundshëm kibernetik global, qeveritë do të duhet të bashkëpunojnë: “Çelësi për të fituar betejën kundër krimit kibernetik është sigurisht që të punojnë së bashku, duke dhënë një përgjigje globale përmes veprimeve të koordinuara dhe të zgjeruara“, përfundon Jurgen Stock i INTERPOL.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.