BQE paralajmëron qeveritë e Eurozonës – “Mos prisni ndihma falas dhe mbështetje të pakushtëzuar”

Qeveritë e Eurozonës nuk duhet të presin mbështetje të pakushtëzuar nga instrumenti i ri i Bankës Qendrore Europiane, kjo për të parandaluar që kostot e huamarrjes të përshkallëzohen shumë për vendet me borxhe të mëdha. Deklarata u bë nga dy zyrtarë të lartë të BQE-së sipas raportimeve të agjencisë së lajmeve Reuters.

Frankfurt ka premtuar se do të veprojë për të parandaluar “fragmentimin” financiar midis shteteve të bllokut me borxhe më të rënda, si Italia dhe Gjermania, pas një zgjerimi të papritur dhe të menjëhershëm të diferencave midis rendimenteve të obligacioneve.

Por guvernatori i bankës qendrore sllovake Peter Kazimir dhe kolegu i tij finlandez Olli Rehn e kanë vendosur kufirin shumë larg për çdo ndërhyrje të bankës qendrore në tregun e bonove.

I pari deklaroi se nuk është vetëm detyra e BQE-së të kufizojë diferencat, të cilat shkaktohen gjithashtu nga brishtësia ekonomike e disa vendeve dhe arkitektura jo e plotë e zonës euro si një bashkim monetar pa mbështetje fiskale.

Ai shtoi se kur bëhet fjalë për copëzimin, shpesh trokitet në derën e gabuar dhe çështja kryesore dhe thelbësore është që ekonomitë e vendeve të modernizohen, të inovohen, të jenë më elastike ndaj këtyre problemeve.

Rehn tha se asnjë vend nuk do të jetë automatikisht i pranueshëm për të përfituar nga instrumenti tjetër, në një referencë të mundshme ndaj kushteve që lidhen me çdo blerje të borxhit të një vendi nga Frankfurt.

Javën e kaluar disa burime thanë për Reuters se ka të ngjarë që BQE të parashikojë disa kufizime për skemën, siç është përputhja me rekomandimet ekonomike të Komisionit Europian.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.