BQE paralajmëron rritje të re të normave të interesave – Lagarde u bën apel bankave që të rinegociojnë kreditë!
«Është ende shumë shpejt për të shpallur fitoren mbi inflacionin”. Është kjo deklarara e presidentes së BQE – së Christine Lagarde, sipas së cilës po shënohen progrese por ka ende shumë punë për të bërë. Ajo u shpreh e vetëdijshme se njerëzit po vujanë për shkak të inflacionit, sidomos ata më të brishtët dhe më të ekspozuarit si pensionistët me të ardhura të pakta. Sipas BQE masat e qeverive duhet të kenë objektiv pikërisht këta persona dhe më pas të rishikojnë planet kur cmimet e energjisë të ulen dhe ato ushqimore të jenë më të qëndrueshme.
Por gjithësesi Lagarde theksoi se inflacioni në tërësi është zvogëluar në muajt e fundit dhe do të vazhdojë të zbresë në muajt e ardhshëm. Ajo tha se rruga që do të ndiqet është shumë e qartë: duhet vazhduar të merren masat e duhura për të rikthyer inflacionin në nivelin e 2%, dhe një gjë e tillë do të ndodhë.
Lagarde shtoi se është shumë e mundur që të rriten më tej normat e interesit me 50 pikë bazë. Sipas saj ky ishte një vendim që ishte paralajmëruar në mbledhjen e fundit, dhe të gjitha shifrat aktuale konfirmojnë se kjo rritje është shumë e mundur. Për të ardhmen ajo nuk dha shumë detaje duke sqaruar se cdo gjë varet nga të dhënat dhe se shumë guvernatorë bankash qendrore po mbrojnë opinionet e tyre dhe analizat personale, ndërsa asaj i duhet të përqendrohet tek të dhënat.
Lagarde tha se bankat europiane mund të marrin masa për të lehtësuar rritjen e mëtejshme të normave të interesit për huamarrësit, ndoshta duke rinegociuar kreditë. Një gjë e tillë sipas saj është në interes dhe të bankave pasi asnjëra prej tyre nuk dëshiron që kreditë të mbesin pa u paguar.
Për sa i përket një tavani të normave, të kërkuar nga disa forca politike në Spanjë dhe Itali, Lagarde u përgjigj se është një çështje midis kreditorit dhe debitorit. Ajo theksoi se ishte e sigurtë se shumë banka janë gati të rishqyrtojnë kushtet e kredisë. Dhe jo për bamirësi, por sepse është në interesin e tyre të kenë debitorë ‘të shëndetshëm’.
Dorina Kurtaj / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.