BQE paralajmëron rritjen e normave të interesit – Inflacioni i lartë nuk ndalet dhe pritet të zgjasë në kohë

Banka Qendrore Europiane është e shqetësuar se inflacioni mund të jetë duke u rrënjosur, dhe për këtë arsye në mbledhjen e fundit u arrit në përfundimin se normat e interesit do të rriten sërish.

BQE rriti normat me 75 pikë bazë në 1.5% në takim, për të luftuar inflacionin e lartë, duke e çuar rritjen totale të saj në 200 pikë bazë që nga korriku. Gjithashtu në rend të ditës u vendos dhe reduktimi i buxhetit prej 9 trilionë eurosh të bankës, duke u afruar më shumë tek zbutjet e blerjeve të borxhit të qeverisë që rrezikonin rindezjen e inflacionit.

BQE shtoi se disa politikëbërës madje shprehën pikëpamjen se “shtrëngimi monetar ndoshta do të duhej të vazhdonte. Kjo pasi qëndrimi i politikës monetare të normalizohej dhe të ishte zhvendosur në një territor gjerësisht neutral.

Rritja e normës me 75 pikë bazë u mbështet nga një shumicë e madhe, megjithëse disa politikëbërës kërkonin një lëvizje më të vogël, me 50 pikë bazë.

Ndërsa BQE-ja është e vendosur për rritje të mëtejshme të normës, tregjet tani presin një lëvizje më modeste, me 50 pikë bazë më 15 dhjetor, pasi disa politikëbërës sugjeruan se një ngadalësim pas rritjeve të njëpasnjëshme prej 75 pikësh bazë, ishte i përshtatshëm.

Një kompromis i mundshëm mund të jetë dhe që një rritje më e vogël e normës të shoqërohet me fillimin e reduktimit të portofolit të obligacioneve të blera në kuadër të Programit të Blerjes së Aseteve prej 3.3 trilion euro të BQE-së, në një proces të njohur si shtrëngim sasior.

Edhe nëse BQE-ja ngadalësohet, tregjet parashikojnë që norma e depozitave të dyfishohet në 3% vitin e ardhshëm pasi inflacionit, tani në 10.6%, do t’i duhen vite, ndoshta deri në vitin 2025, që të arrijë në objektivin e BQE-së prej 2%.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.