BQE, pranë fundit të rritjeve të normave të interesit – Inflacioni në eurozonë do fillojë të ulet në muajin mars

Anëtari i këshillit drejtues të Bankës Qendrore Europiane, Mario Centeno, u shpreh se procesi aktual i rritjes së normave të interesit po i afrohet fundit. Centeno, njëkohësisht edhe Guvernator i Bankës Qendrore të Portugalisë, shtoi se dhe pse inflacioni mund të ketë njëfarë rezistence në janar dhe shkurt, ai do të rifillojë të ulet në muajin në mars.

Ai tha gjithashtu se përditësimet e pagave në Europë mund ta bëjnë të vështirë që çmimet të vazhdojnë të bien në dy muajt e ardhshëm, por pas kësaj, inflacioni do të bjerë nga marsi e në muajt në vazhdim. Inflacioni vjetor në eurozonë u ngadalësua në 9.2% në dhjetor nga 10.1% në nëntor, sipas të dhënave të Eurostat.

BQE parashikoi një rënie graduale të inflacionit, por vetëm duke iu afruar objektivit të saj prej 2% brenda tre viteve. BQE rriti normën që paguan për depozitat bankare me 50 pikë bazë në 2% më 15 dhjetor, duke moderuar shtytjen e saj për shtrëngimin e politikave pas dy rritjeve të njëpasnjëshme prej 75 pikësh bazë.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.