Brexit, një “aksident rrugor” i Britanisë – Shefi i Ryanair: Mini-buxheti ishte një dështim spektakolar i konceptit më të gjerë të Brexit

Shefi i Ryanair, Michael O’Leary, e krahasoi sot situatën financiare të Britanisë me një “aksident rrugor” të shkaktuar nga referendumi i vitit 2016 i vendit për t’u larguar nga Bashkimi Europian. “Mini-buxheti ishte një lloj dështimi spektakolar i konceptit më të gjerë të Brexit”, tha O’Leary, duke shtuar se gjëja e parë që i duhej Britanisë ishte një marrëveshje e arsyeshme tregtare me Bashkimin Europian.

Ministri i ri i Financave të Britanisë, Jeremy Hunt, anuloi planet ekonomike të kryeministres Liz Truss në një ndryshim historik të politikës për të frenuar një rënie dramatike të besimit të investitorëve. Irlandezi O’Leary tha se priste që Truss, e cila u bë kryeministre muajin e kaluar, të shkarkohej brenda një ose dy javësh.

“Mini-buxheti u rrëzua. Pra, ajo është në vendin e saj, por jo në pushtet”, tha ai. Sipas tij, Truss, e cila donte që Britania të qëndronte në BE në kohën e referendumit të vitit 2016, po paguan tani çmimin e angazhimeve që bëri ndaj anëtarëve të partisë Konservatore, që e zgjodhën për të qeverisur vendin pasi Boris Johnson dha dorëheqjen.

“Ajo u zgjodh, duke iu drejtuar të gjithë mbështetësve të Brexit-it gjatë tre muajve të fundit dhe është, mendoj, kolapsi përfundimtar i Brexit-it dhe mbështetësve të tij”, tha ai.

Truss miratoi një qëndrim euroskeptik gjatë fushatës së saj të udhëheqjes konservatore këtë verë, duke marrë parasysh shqetësimet e anëtarëve të partisë duke u zotuar të shfuqizojë të gjitha ligjet e BE-së, të cilat vazhdojnë të aplikohen në Britani deri në vitin 2023.

O’Leary përshëndeti emërimin e Hunt, i cili mori postin e ministrit të Financave të premten e kaluar dhe që atëherë ka rishkruar planet e qeverisë të publikuara muajin e kaluar.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.