Britania “shuan” naftën Ruse – Në qershor nuk u importuan karburante. Në rënie të ndjeshme edhe mallrat e tjerë

Pas pushtimit rus të Ukrainës dhe sanksioneve të mëvonshme ekonomike mbi tregtinë, importet Britanike të mallrave nga Rusia u ulën në 33 milionë paund në qershor 2022 dhe janë në nivelin më të ulët që nga fillimi i regjistrimeve në janar 1997. Ndërkohë, që për herë të parë nuk u importuan karburante nga ky vend.

Sipas të dhënave më të fundit nga Zyra e Statistikave Kombëtare, kjo është një rënie prej 499 milionë paund, ose 100% me muajin shkurt 2022. Më 8 mars, vetëm pak ditë pasi Rusia sulmoi ushtarakisht Ukrainën, qeveria e Mbretërisë së Bashkuar njoftoi se do të ndalonte gradualisht importet e naftës ruse deri në fund të vitit dhe do të përfundonte importet e gazit natyror të lëngshëm rus sa më shpejt të ishte e mundur.

Ndërsa importet e naftës janë lejuar gjatë kësaj periudhe tranzicioni, bizneset kanë qenë inkurajuar për të siguruar naftën nga burime alternative, çka ka rezultuar në një ulje të mprehtë dhe të vazhdueshme të karburantit të importuar që nga marsi 2022.

Para pushtimit të Ukrainës, Rusia ishte furnizuesi më i madh i Mbretërisë së Bashkuar me naftë të rafinuar në vitin 2021, duke zënë 24.1% nga të gjitha importet e këtij malli dhe furnizuar gjithashtu 5.9% të importeve të naftës bruto dhe 4.9% të gazit.

Gjatë kësaj periudhe kompanitë kërkuan alternativa të reja dhe vërehet se ka pasur rritje të importeve të naftës së rafinuar nga Arabia Saudite, Holanda, Belgjika dhe Kuvajti në muajt e fundit duke kompensuar pjesërisht importet e reduktuara nga Rusia. Importet e të gjitha mallrave kanë shënuar rënie krahasuar me mesataren mujore që nga shkurti.

Nga ana tjetër, megjithëse eksportet drejt Rusisë u rritën lehtë në qershor krahasuar me muajin paraardhës, nivelet e tyre kanë rënë me 168 milionë paund, ose 66.9% krahasuar me mesataren mujore që nga shkurti.

Kimikatet ishin i produkt i eksportuar në Rusi që u rrit gjatë kësaj periudhe, ndërsa një rritje prej 39.1 milionë paund, ose 61.8% u regjistrua në eksportet e produkteve mjekësore dhe farmaceutike, që janë të përjashtuara nga sanksionet.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.