Bursa energjisë, listohen 3 anëtarët e parë – Bëhen pjesë kompanitë publike, nisja e funksionimit ende e pacaktuar 

Kompanitë publike të energjisë janë anëtarët e parë të Bursës Shqiptare të Energjisë Elektrike. ALPEX ka njoftuar se Furnizuesi i Shërbimit Universal dhe Furnizuesi i Tregut të Lirë, që janë 2 kompani të OSHEE Group, si dhe Operatori i Sistemit të Transmetimit janë anëtarësuar përgjatë javës së fundit, duke nënshkruar Marrëveshjen e Antëarësimit për Tregun e Ditës në Avancë.

Ndërkaq, nga sektori privat, ende nuk ka kompani të antarësuara. Sipas rregullave të miratuara, për t’u pranuar në Bursë, aplikantët duhet të përfundojë me sukses të gjithë procesin, i cili përfshin tre faza individuale.

Faza e parë përfshin Vlerësimin e Aplikimit për Anëtarësim, ndërsa faza e dytë përgatitjen për aktivizimin e Anëtarit të Bursës në Sistemin e Tregtimit të Energjisë në Çast (ETSS), ku çdo anëtar i Bursës duhet të caktojë një numër të mjaftueshëm të Agjentëve Tregtarë të tij sipas nevojave, të cilët do të ndjekin trajnimet dhe do të zhvillojnë provimin për të aplikuar më pas për marrjen e Certifikatës së Agjentit Tregtar.

Ndërkaq, faza e tretë parashikon aktivizimin e anëtarit të Bursës, ku gjithashtu do të duhet të plotësohen disa dokumente. Bursa Shqiptare e Energjisë Elektrike do të duhej të kishte nisur funksionimin prej kohësh, por deri më tani nuk është kryer asnjë transaksion.

Afatet janë shtyrë herë pas here, ndërsa sipas deklaratave të fundit nga përfaqësues të institucioneve, nisja e operimeve duhet të ndodhë brenda muajit qershor të këtij viti.

Funskionimi i bursës së energjisë pritet të sjellë një rritje të konkurrencës si dhe lehtësim të blerjes së energjisë, edhe pse së fundmi ekspertët kanë ngritur dyshime, duke qenë se Korporata Elektroenergjetike Shqiptare ka hapur garën për blerjen e energjisë për një peirudhë afatgjatë 3 dhe 5-vjeçare.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.