Bursat europiane e nisin javën në rritje – Fitimet kufizohet nga pritshmëritë për rritjen e interesave në SHBA
Tregjet europiane janë hapur në rritje në sesionin e parë të kësaj jave, për shkak të të dhënave pozitive mbi ekonominë amerikane. Por, në anën tjetër, shqetësimet për norma më të larta interesi po kufizojnë fitimet.
Ndërkohë, shumica e tregjeve në rajonin e Azi-Paqësorit patën një tendencë mikse, ndërsa Wall Street publikoi humbje të konsiderueshme të premten, për shkak se treguesi kryesor i inflacionit në SHBA rezultoi më lart se parashikimet e analistëve. Inflacioni në ekonominë më të madhe në botë vijon të qëndrojë në nivele të larta dhe për këtë arsye tregjet presin norma më të larta interesi.
Në këtë situatë, në takimin e 21 dhe 22 marsit, Rezerva Federale pritet të rrisë normën bazë të interesit me 25 pikë bazë, por ka edhe nga ata analistë që presin një rritje me 50 pikë bazë. Në fokus të tregjeve do të jenë edhe fitimet tremujore të korporatave dhe gjatë ditës së sotme pritet të publikojë raportet e tyre kompani si Saipem, dhe Commerzbank.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.