Bursat europiane, në ditën e tretë në rënie – FMN ul parashikimin për ekonominë globale. Investitorët presin inflacionin në SHBA

Bursat europiane po qëndrojnë në rënie edhe në sesionin e sotëm, ndërsa investitorët janë në pritje të të dhënave mbi inflacionin në SHBA. Indeksi pan-Europian, Stoxx 600, po qëndron në rënie me rreth 0.4%, ndërsa sektori bankar realizon humbjet më të mëdha në rënie me rreth 1.1%.

Të martën, Fondi Monetar Ndërkombëtar uli parashikimin për rritjen ekonomike globale për vitin e ardhshëm, në 2.7%, 0.2 pikë përqindje më pak se parashikimi i korrikut, por shtoi se viti 2023 për milionë njerëz në botë do të jetë si një recesion. Ndërkohë, Banka e Anglisë ndërhyri sërish në tregun e obligacioneve për të vendosur rregull në tregjet britanike.

Ndër zhvillimet e tjera, Prodhimi i Brendshëm Bruto në Mbretërinë e Bashkuar u kontraktua me 0.3% gjatë muajit gusht, krahasuar me korrikun. Rënia e aktivitetit u kryesua nga dobësimi i sektorit të manifakturës.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.