Bursat zgjerojnë humbjet – Tregjet presin rezultatin përfundimtar të zgjedhjeve në SHBA
Tregjet europiane po qëndrojnë në rënie në sesionin e sotëm, pasi investitorët po presin rezultatin përfundimtar të zgjedhjeve në SHBA, ku mesa duket republikanët nuk kanë realizuar atë fitore që pritej. Indeksi pan-Europian Stoxx 600 e ka nisur ditën në rënie me 0.3%, ndërsa sektori i shitjeve me pakicë realizon humbjet më të mëdha në rënie me 1.8%.
Sipas rezultateve paraprake, republikanët do të marrin kontrollin e Dhomës së Përfaqësuesve me një avantazh të lehtë, ndërsa demokratët kanë fituar edhe një vend në Senat. Gjatë fjalës së tij, presidenti amerikan, Joe Biden deklaroi se është i përgatitur të punojë me republikanët nëse ata do të marrin kontrollin e të dyja dhomave.
Në anën tjetër, ish-Presidenti amerikan, Donald Trump, ka festuar fitoren e republikanëve, pavarësisht se kanë humbur në disa shtete kyçe. Në fokus të tregjeve vijojnë të jenë edhe fitimet tremujore të korporatave.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.