Centrali bërthamor i gjeneratës së re në SHBA – Bill Gates, iniciator i njësisë që do të përdorë natrium dhe jo ujë për ftohje

Një termocentral bërthamor i gjeneratës së ardhshme që premton të “revolucionarizojë” mënyrën se si prodhohet energjia, filloi ndërtimin këtë javë në Wyoming, SHBA. Iniciatori i saj është bashkëthemeluesi i Microsoft, Bill Gates, president i kompanisë TerraPower që menaxhon projektin në komunitetin e vogël të Kemerer. Në mars, kompania aplikoi në Komisionin Rregullator Bërthamor – NRC për një licencë për të ndërtuar një reaktor bërthamor të avancuar që përdor natrium në vend të ujit për ftohje dhe do të funksionojë si një termocentral bërthamor komercial.

Ai po ndërtohet pranë termocentralit Naughton të PacifiCorp., i cili do të ndalojë djegien e qymyrit në vitin 2026 dhe gazit natyror një dekadë më vonë, tha kompania, e cila planifikon të marrë energji pa karbon nga reaktori. Reaktorët bërthamorë funksionojnë pa emetuar gazra serë që shkaktojnë ngrohjen globale.

Në krye të zhvillimit të reaktorit të ftohur me natrium është Rusia. Në hapjen e veprës, Gates i tha audiencës se po qëndronte përpara një projekti “që së shpejti do të jetë themeli i së ardhmes energjetike të Amerikës”.

Reaktorët e avancuar zakonisht përdorin një ftohës të ndryshëm nga uji dhe funksionojnë në presione më të ulëta dhe temperatura më të larta. Kjo teknologji ka ekzistuar për dekada, megjithatë SHBA-ja ka vazhduar të ndërtojë reaktorë të mëdhenj, konvencionalë me ftohje me ujë si termocentrale komerciale. Është hera e parë në gati katër dekada që një kompani ka tentuar të operojë një reaktor të avancuar si një central komercial të prodhimit të energjisë elektrike në SHBA. Projekti pritet të kushtojë deri në 4 miliardë dollarë, ku gjysma vjen nga Departamenti i Energjisë i SHBA. Shumica e reaktorëve bërthamorë të avancuar në zhvillim në SHBA mbështeten në një lloj karburanti që pasurohet në një përqindje më të lartë të izotopit të uraniumit-235 sesa karburanti i përdorur nga reaktorët konvencionalë. TerraPower e vonoi punën sepse Rusia është furnizuesi i vetëm tregtar i karburantit dhe po punon me kompani të tjera për të zhvilluar furnizime alternative.

Reaktori i kompanisë mund të prodhojë deri në 500 megavat, të mjaftueshme për të furnizuar me energji 400.000 shtëpi. TerraPower tha se reaktorët e saj të parë do të fokusohen në sigurimin e energjisë elektrike, por parashikon reaktorët e ardhshëm pranë objekteve industriale për të siguruar ngrohje të lartë. Pothuajse të gjitha proceset industriale që kërkojnë nxehtësi të lartë sot e marrin atë nga djegia e lëndëve djegëse fosile.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.