Çfarë po ndodh me litiumin, nikelin dhe kobaltin – Në vitin 2022 çmimet regjistronin rritje. “Përmbyset” situata
Nëse në vitin 2022 çmimet e metaleve për bateritë po rriteshin duke shënuar rekorde të reja dhe prodhuesit e automjeteve ishin të shqetësuar nga mungesa afatgjata, në vitin 2023 dinamika e tregut është përmbysur. Këtë vit, litiumi ka rënë me gati 70%, ndërsa nikeli ka rënë me rreth 40%. Rënie ka shënuar gjithashtu dhe kobalti.
Treshja e metaleve për bateritë e automjeteve elektrike janë tani ndër produktet me performancën më të dobët mes rritjes së ngadalësuar të shitjeve të automjeteve elektrike dhe rritjes së furnizimit nga Kina, Indonezia dhe Republika Demokratike e Kongos.
Ekspertët shprehen se ka padyshim furnizim të mjaftueshëm për të gjithë për momentin, dhe se çmimet e metaleve të baterive ishin shumë të larta për të qenë të qëndrueshme nëse prodhimi do të ishte rritur më shpejt se sa pritej.
Shitjet e automjeteve elektrike vazhdojnë të rriten, por rritja e normave të interesit dhe kushtet e pasigurta ekonomike po zbehin kërkesën e konsumatorëve. Në Kinë, që regjistrohet dhe tregu më i madh, rritja u ngadalësua nga viti në vit.
Sipas analistëve një “akumulim i madh” i baterive të prodhuara në Kinë ka bërë që oferta të tejkalojë kërkesën dy me një. Si reagim ndaj kësaj, prodhuesit e baterive kanë reduktuar prodhimin dhe çmimet e litiumit, nikelit dhe kobaltit ka të ngjarë të mbeten të ulëta në afat të shkurtër.
Çmimet më të ulëta të metaleve po ndihmojnë prodhuesit e automjeteve dhe prodhuesit e baterive dhe gjithashtu mund të ulin çmimet e automjeteve elektrike. BYD, prodhuesi më i madh i automjeteve elektrike në Kinë, dhe Contemporary Amperex Technology, prodhuesi më i mirë i baterive në vend, kanë përfituar të dy nga kostot më të ulëta të litiumit.
Zhvillimet e fundit në përpunimin e metaleve ndikuan mbi çmimet. Ka pasur një zgjerim të papritur të minierave të litiumit në Kinë, ndërsa tregu i nikelit është transformuar nga një cunami i prodhimit të lirë nga fabrikat e financuara nga Kina në Indonezi. Më shumë kobalt prodhohet gjithashtu, veçanërisht në Republikën Demokratike të Kongos dhe Indonezi.
Dorina Kurtaj /SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.