Çfarë prodhuam më shumë gjatë 2022-shit? – Ulliri mban “kampion”, lë në “hije” produktet e tjera
Bujqësia është sektori më i rëndësishëm për vendin, i cili përbën mbi 20 për qind të Prodhimit të Brendshëm Bruto dhe mbarësia në prodhim përkthehet në më shumë të ardhura për fermerët. Por si ka qenë harta e prodhimeve bujqësore bujqësore “Made in Albania” gjatë 2022-shit? Referuar të dhënave zyrtare të Ministrisë së Bujqësisë, prodhimi i ullirit mban “kampion” me një rritje disa herë më të lartë se produktet e tjera, afro 39 për qind krahasuar me një vit më parë.
Pra nëse në vitin 2021 u prodhuan afro 110 mijë ton ullinj, përgjatë vitit që lamë pas, prodhimi arriti në 152.624 tonë. Për tregun vendas kjo sasi është konsideruar si mbiprodhim dhe fermerët po hasin vështirësi në shitjen e vajit të ullirit. Në vendin e dytë renditen agrumet, siç janë portokalle, mandarina, limona, etj, të cilat regjistrohen me një rritje 9 për qind.
Gjithashtu prodhimi i mjaltit është rritur me 6 për qind, si pasojë e shtimit të numrit të koshereve dhe të bletërritësve ndër vite. Ndërkohë, me një kapërcim më të moderuar janë pemët frutore me 5 për qind, gruri me 4 për qind si dhe vreshti me 3 për qind. Fushata e ndërmarrë nga qeveria për mbështetjen e fermerëve për mbjelljen e grurit pritet t’i japë rezultatet gjatë 2023-shit, ndërsa prodhimi i vitit që lamë pas lidhet më së shumti me vullnetin e vetë fermerëve për kultivimin e kësaj kulture.
E ndërsa bujqësia në tërësi ka ecur në shina pozitive e kundërta ka ndodhur me sektorin e blegtorisë ku vihet re rënie e prodhimit të mishit me 5 për qind dhe e qumështit me 3 për qind. Shkak për këtë perfomancë negative nga viti në vit është tkurrja e sektorit në tërësi, ku sipas shifrave të INSTAT përgjatë dekadës së fundit ka pasur një rënie të ndjeshme të numrit të krerëve të gjedhëve dhe të të imtave.
Elisabeta Dosku / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.