Cila është Holta Zaçaj, Kryetare e re e Gjykatës Kushtetuese – Fiton në raundin e tretë me 5 vota garën kundër Papajorgjit dhe Seminit
Pas dështimit të dy raundeve të para, pasi asnjë prej kandidatëve nuk siguroi shumicën e votave, Holta Zaçaj është zgjedhur Kryetare e re e Gjykatës Kushtetuese. Ajo siguroi në raundin e tretë 5 vota, kundrejt 3 të Fiona Papajorgjit dhe 1 të Marjana Seminit. Zaçaj zëvendëson në Krye të Gjykatës Kushtetuese Vitore Tushen, e cila e mbuloi këtë pozicion edhe pse mandati i kishte përfunduar që në 2017.
Dy mbledhjet e mëparshme të zhvilluara në datat 15 dhe 17 shkurt dështuan të përzgjidhnin kryetaren, pasi asnjë nga kandidatet nuk mori shumicën ligjore prej të paktën 5 votash, të 9 anëtarëve që ka në përbërje Gjykata Kushtetuese.
Holta Zaçaj është Diplomuar në Fakultetin e Drejtësisë në Universitetin e Tiranës, në vitin 1998. Në periudhën 2007-2008 ka kryer masterin shkencor për “Titujt dhe rregullimet financiare”, në Universitetin e Georgetoën në SHBA, në kuadër të programit Fullbright.
Ajo është angazhuar në vitet 1999- 2001, në Qendrën “Paqe nëpërmjet Drejtësisë”, projekti për krimet e luftës në Kosovë. Më pas, është angazhuar si avokate në Qendrën e Praktikave dhe Shërbimeve Ligjore të Integruara (QSHPLI), në projektet e ndihmës ligjore falas, si: Klinika Ligjore për të Miturit, Zyra e Avokatit të Qytetit pranë Bashkisë Tiranë, Klinka Ligjore për Refugjatët.
Zacaj ka ushtruar profesionin e avokatit edhe në Massachusetts, të Shteteve të Bashkuara të Amerikës, në një kohë që prioritet në karriere ka pasur të drejtën familjare dhe pasuritë e paluajtëshme.
Lorenc Rabeta / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.