Cilat ishin rreziqet për ushtrinë në 2023? – Bali: Mbështesim autoritetet e FA në fushën e zbulimit dhe kundërzbulimit

Mungesa e gatishmërisë operacionale apo veprimtaritë me karakter spiunazhi kanë qenë disa nga problematikat kryesore të Forcave të Armatosura, ndaj të cilave ka pasur një vëmendje të shtuar. Në Komisionin për Sigurinë Kombëtare është zhvilluar një seancë dëgjimore me Agjencinë e Inteligjencës dhe Sigurisë së Mbrojtjes lidhur me raportimin e veprimtarisë së institucionit për vitin 2023.

Gjatë mbledhjes, Drejtori i Agjencisë së Inteligjencës dhe Sigurisë së Mbrojtjes listoi rreziqet dhe kërcënimet ndaj Forcave të Armatosura gjatë vitit të kaluar.

“Për sa i përket rreziqeve dhe kërcënimeve ndaj Forcave të Armatosura, vëmendje e veçantë i është kushtuar problematikave të sigurisë fizike, infrastrukturës, sigurisë kibernetike, sigurisë së informacionit, aktiviteteve të paligjshme, gatishmërisë operacionale në forcat e armatosura, veprimtarive me karakter spiunazhi që mund të cenojnë sigurinë e forcave tona të armatosura, përgatitja e vlerësimit të kërcënimit lokal për rajonet e dislokimit të përhershëm, njësive dhe reparteve ushtarake të forcave të armatosura si dhe rajoneve stërvitore ku mund të përmendet se janë zhvilluar  një sërë stërvitjesh kombëtare dhe ndërkombëtare.”

Ai u ndal gjithashtu në mbështetjen që Agjencia e Inteligjencës dhe Sigurisë së Mbrojtjes, ka ofruar për Forcat e Armatosura.

“Synimi kryesor i AISM ka qenë realizimi i detyrave në funksion të përmbushjes së misionit të saj, atë për mbështetjen e autoriteteve të drejtimit dhe komandimit të forcave të armatosura me inteligjencë në fushën e zbulimit, kundërzbulimit dhe sigurisë. Viti 2023 është shënjuar nga ngjarje me ndikime shumëdimensionale në nivel global, rajonal dhe kombëtar.”

Rigjallërimi i industrisë ushtarake është një ndër prioritetet kryesore të Ministrisë së Mbrojtjes, teksa së fundmi ka parashikuar edhe një rritje të buxhetit kushtuar ushtrisë.  Aktualisht, po investohet në rritjen e kapaciteteve ushtarake nëpërmjet modernizimit të armatimeve dhe sistemit të mbrojtjes në tërësi.

Ledina Elezi/SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.